काठमाडौं, २८ असोज। धितोपत्र बजारमा शेयर कारोबार मापक नेप्से परिसूचक बुधबार दोहोरो अङ्कले बढेको छ। नेपाल स्टक एक्सचेञ्ज (नेप्से) का अनुसार परिसूचक २१ दशमलव ३२ अङ्कले बढेर २ हजार ६२१ दशमलव २६ विन्दुमा पुगेको हो।
ठूला कम्पनीको कारोबार मापन गर्ने सेन्सेटिभ परिसूचक ४ दशमलव ७९ अङ्कले बढेर ४७४ दशमलव ९६ विन्दुमा पुगेको छ। त्यस्तै, फ्लोट सूचक १ दशमलव ६१ अङ्कले बढेर १८१ दशमलव ६३ विन्दुमा पुगेको छ भने सेन्सेटिभ फ्लोट सूचक १ दशमलव ७१ अङ्कले बढेर १६० दशमलव ६८ विन्दुमा पुगेको छ।
आज विभिन्न कम्पनीका १ करोड १६ लाख ७४ हजार २०९ कित्ता शेयर खरिदबिक्री भएका छन्। ती शेयरको कुल कारोबार रकम ४ अर्ब १३ करोड ६१ लाख ६१ हजार ३३१ रुपैयाँ पुगेको छ।
कारोबार भएका १३ वटै उपसमूहको परिसूचक बढेको छ। आज १८८ कम्पनीको शेयर मूल्य बढ्दा ८० कम्पनीको घटेको छ भने ९ कम्पनीको शेयर मूल्य स्थिर रहेको छ।
नेप्सेका अनुसार एसबीएल डिबेञ्चर, नेपाल एसबीआई बैंक डिबेञ्चर र उपकार लघुवित्त वित्तीय संस्थाका लगानीकर्ताले कमाएका छन्। त्यस्तै, सगरमाथा जलविद्युत् कम्पनी, एभरेष्ट कलर र स्वाभिमान लघुवित्त वित्तीय संस्थाका लगानीकर्ताले गुमाएका छन्।
