काठमाडौं, २८ असोज। प्रधानसेनापति अशोकराज सिग्देल बेलायतको औपचारिक भ्रमण सम्पन्न गरी स्वदेश फर्किएका छन्।
बुधबार स्वदेश फर्किएका प्रधानसेनापति सिग्देललाई त्रिभुवन अन्तर्राष्ट्रिय विमानस्थलमा बलाधिकृत रथी प्रदीपजंग क्षेत्रीले स्वागत गरेका थिए।
बेलायती सेनाका प्रमुख जनरल रोली वाकरको निमन्त्रणामा प्रधानसेनापति सिग्देल बेलायत भ्रमणमा गएका थिए। सैनिक मुख्यालय जंगी अड्डाका अनुसार भ्रमणका क्रममा उनले बेलायतका उच्च सैनिक अधिकारीहरूसँग शिष्टाचार भेटघाट गरेका थिए।
बेलायतमा रहँदा उनले अन्तर्राष्ट्रिय सैनिक अभ्यास ‘एक्सरसाइज क्याम्ब्रियन पेट्रोल २०२६’ को निरीक्षणसमेत गरेका थिए। उक्त अभ्यासमा स्वर्ण पदक प्राप्त गर्ने नेपाली टोलीलाई उनले प्रधानसेनापति प्रशंसा निशाना प्रदान गरेका थिए।
भ्रमणका क्रममा भएका भेटघाट तथा सैनिक अभ्यासको निरीक्षणले नेपाल र बेलायतका सेनाबीचको सम्बन्ध र सहकार्यलाई थप बलियो बनाउन सहयोग पुग्ने अपेक्षा गरिएको छ।
