३१ असोज, काठमाडौं । राष्ट्रिय स्वतन्त्र पार्टी (रास्वपा) ले बडादसैँ, तिहार, नेपाल संवत् तथा छठ पर्वका अवसरमा शुभकामना आदानप्रदान गर्दा उपहार लिनेदिने काम नगर्न पार्टीका नेता तथा कार्यकर्तालाई निर्देशन दिएको छ।
रास्वपाका महामन्त्री विपिनकुमार आचार्यले शुक्रबार शुभकामना सन्देश जारी गर्दै पार्टीले स्थापनाकालदेखि नै चाडपर्वका अवसरमा उपहार आदानप्रदान गर्ने प्रचलनलाई निरुत्साहित गर्दै आएको स्मरण गराएका हुन्।
उनले राजनीतिमा नागरिकको सद्भाव, आशीर्वाद र विश्वास नै सबैभन्दा ठूलो उपहार भएको उल्लेख गरेका छन्।
“राजनीतिमा नागरिकको सद्भाव, आशीर्वाद र विश्वास नै सबैभन्दा ठूलो उपहार हो,” आचार्यले सन्देशमा भनेका छन्।
चाडपर्वको मूल सन्देश निःस्वार्थ प्रेम, सद्भाव र आत्मीयता भएको उल्लेख गर्दै उनले सुसंस्कृत राजनीतिक संस्कार निर्माणका लागि सबैको साथ र सहयोगको अपेक्षा गरेका छन्।
महामन्त्री आचार्यले यस अवसरमा स्वदेश तथा विदेशमा रहेका सम्पूर्ण नेपालीलाई बडादसैँ, तिहार, नेपाल संवत् तथा छठ पर्वको शुभकामना व्यक्त गरेका छन्।
पार्टीले चाडपर्वका अवसरमा उपहार आदानप्रदानलाई निरुत्साहित गर्ने नीतिमार्फत राजनीतिक क्षेत्रमा सुसंस्कृत व्यवहार र नागरिकको विश्वासलाई प्राथमिकता दिन खोजेको सन्देश दिएको छ।
