काठमाडौँ । सत्तारूढ राष्ट्रिय स्वतन्त्र पार्टी (रास्वपा) का सभापति रवि लामिछाने र अमेरिकी विदेशमन्त्री मार्को रुबियोबीच टेलिफोन संवाद भएको छ।
संवादका क्रममा अमेरिकी विदेशमन्त्री रुबियोले भोटेकोशी बाढीका कारण भएको जनधनको क्षतिप्रति गहिरो दुःख व्यक्त गर्दै नेपाल सरकार तथा नेपाली जनताप्रति ऐक्यबद्धता जनाएका छन्।
रुबियोले विपद्को यस कठिन परिस्थितिमा नेपाललाई आवश्यक सहयोग उपलब्ध गराउन अमेरिकी सरकार तयार रहेको समेत बताएका छन्। उनले नेपाल सरकारलाई आवश्यक थप सहयोग उपलब्ध गराउने प्रतिबद्धता व्यक्त गरेका हुन्।
जवाफमा रास्वपा सभापति लामिछानेले भोटेकोशी बाढीपछि जारी खोज, उद्धार तथा राहत कार्यलाई प्रभावकारी बनाउन नेपाल सरकारले उपलब्ध सबै स्रोतसाधन परिचालन गरिरहेको जानकारी गराएका थिए।
लामिछानेले नेपाली नागरिकसँगै नेपालमा रहेका विदेशी नागरिकको सुरक्षाप्रति पनि सरकार समान रूपमा प्रतिबद्ध रहेको बताएका थिए।
यस कठिन परिस्थितिमा अमेरिकी सरकारबाट प्राप्त सहयोग, सहानुभूति र ऐक्यबद्धताप्रति लामिछानेले रुबियोमार्फत अमेरिकी सरकारलाई धन्यवाद दिएका छन्।
टेलिफोन संवादका क्रममा दुवै पक्षले विपद्का कारण उत्पन्न परिस्थितिमा आवश्यक समन्वय र सहयोगलाई निरन्तरता दिने विषयमा समेत कुराकानी गरेको जनाइएको छ।
