२ असोज, हेटौंडा । हेटौंडाबाट काठमाडौं आवतजावतका लागि प्रयोग हुने त्रिभुवन राजपथ (बाइरोड) र कान्ति राजमार्गमा शुक्रबारदेखि नियमित रूपमा दुईतर्फी सवारी आवागमन सञ्चालनमा आएको छ।
जिल्ला प्रशासन कार्यालय मकवानपुरका प्रशासकीय अधिकृत सन्तोष सुवेदीका अनुसार पृथ्वी राजमार्गअन्तर्गत धादिङको कृष्णभीर खण्डमा अवरुद्ध सडक सञ्चालनमा आएसँगै हेटौंडाबाट काठमाडौं जाने दुवै मार्गमा दुईतर्फी यातायात खुला गरिएको हो।
त्रिभुवन राजपथले हेटौंडालाई पालुङ–नौबिसे हुँदै काठमाडौंसँग जोड्छ भने कान्ति राजमार्गले हेटौंडालाई टीकाभैरव–ललितपुर हुँदै काठमाडौं उपत्यकासँग जोड्छ।
कृष्णभीरमा सडक अवरुद्ध भएपछि सवारी आवागमनलाई सहज, सुरक्षित र व्यवस्थित बनाउन प्रशासनले गत १६ भदौदेखि मालवाहक तथा ठूला यात्रुवाहक सवारीसाधनका लागि एकतर्फी यातायात व्यवस्था लागू गरेको थियो। उक्त व्यवस्थाअनुसार काठमाडौं जाने सवारीसाधनलाई त्रिभुवन राजपथ र फर्कने सवारीसाधनलाई कान्ति राजमार्ग प्रयोग गर्न भनिएको थियो।
कृष्णभीर खण्डमा सडक सञ्चालनमा आएपछि उक्त एकतर्फी व्यवस्था हटाइएको हो। अब दुवै राजमार्गमा सवारीसाधनले नियमित रूपमा दुवैतर्फ आवतजावत गर्न पाउने भएका छन्।
