काठमाडौं, २७ असोज। नेपाली कांग्रेसको १५औँ महाधिवेशनअन्तर्गत नयाँ केन्द्रीय कार्यसमिति चयनका लागि भएको निर्वाचनको मतगणना तीव्र गतिमा अघि बढिरहेको छ।
बडादसैँलाई ध्यानमा राख्दै मतगणना छिटो र प्रभावकारी रूपमा सम्पन्न गर्न मंगलबार पनि २५ वटा समूह बनाएर विभिन्न पदको मत एकैसाथ गणना भइरहेको निर्वाचन समितिले जनाएको छ।
कांग्रेस केन्द्रीय निर्वाचन समितिका सदस्यसचिव राजु कटुवालका अनुसार पार्टी केन्द्रीय कार्यालयमा मतगणना व्यवस्थित र मर्यादित रूपमा अघि बढिरहेको छ। निर्वाचन समितिले बुधबारसम्म सबै पदको अन्तिम परिणाम सार्वजनिक गर्ने लक्ष्य राखेको छ।
कटुवालले मंगलबार बिहानसम्म दुई क्लस्टरको मतगणना सम्पन्न भएको जानकारी दिए। उनका अनुसार चार क्लस्टरको गणना जारी छ भने बाँकी छ क्लस्टरको मतगणना पनि सुरु गर्ने तयारी भइरहेको छ।
निर्वाचन समितिका अनुसार जनसम्पर्क समितितर्फ दुई महिला र पाँच खुला गरी सात जना केन्द्रीय सदस्यको मतगणना सम्पन्न भएको छ। त्यस्तै, पिछडिएको क्षेत्रतर्फको सहमहामन्त्री र केन्द्रीय सदस्य पदको मतगणना पनि सकिएको छ।
हाल खुला सहमहामन्त्री, महिला सहमहामन्त्री तथा महिला केन्द्रीय सदस्य पदको मतगणना भइरहेको छ।
त्यसैगरी, आदिवासी जनजातितर्फको सहमहामन्त्री र केन्द्रीय सदस्य पद तथा भूगोलतर्फ सुदूरपश्चिम प्रदेशका खुला, महिला र ३५ वर्षमुनिका केन्द्रीय सदस्य पदको मतगणना जारी छ। ३५ वर्षमुनिका खुला केन्द्रीय सदस्य पदको मत पनि गणना भइरहेको निर्वाचन समितिले जनाएको छ।
बाँकी क्लस्टरको मतगणना पनि सुरु गरेर निर्धारित समयभित्र सबै पदको परिणाम सार्वजनिक गर्ने तयारी निर्वाचन समितिको छ।
