कञ्चनपुर– सशस्त्र प्रहरीले कञ्चनपुरको गड्डाचौकी सीमावर्ती क्षेत्रबाट भन्सार छली नेपाल ल्याइएका सामान बरामद गरेको छ।
सशस्त्र प्रहरी बल, नेपाल सीमा सुरक्षा गुल्म हेडक्वार्टर गड्डाचौकीबाट खटिएको मोबाइल गस्ती टोलीले भारतीय नम्बर प्लेटको स्कुटरसहित ६६ हजार ८ सय ७० रुपैयाँ बराबरको किराना सामान बरामद गरेको हो।
बरामद सामानलाई आवश्यक कारबाहीका लागि कञ्चनपुर भन्सार कार्यालय, गड्डाचौकीमा मुद्दा नम्बर २८३ अन्तर्गत दाखिला गरिएको सशस्त्र प्रहरीले जनाएको छ।
यस्तै, सोही दिन सशस्त्र प्रहरीको मोबाइल गस्ती टोलीले भारतीय नम्बर प्लेटको अर्को एक थान स्कुटर तथा कपडा समेत बरामद गरेको छ। उक्त सामानको भन्सार मूल्य करिब १ लाख ७० हजार रुपैयाँ रहेको प्रहरीले जनाएको छ।
बरामद स्कुटर तथा कपडा आवश्यक कारबाहीका लागि कञ्चनपुर भन्सार कार्यालय पठाइएको सशस्त्र प्रहरीले जनाएको छ।
दुवै घटनामा बरामद सामानको कुल भन्सार मूल्य करिब २ लाख ३६ हजार ८७० रुपैयाँ रहेको छ।
