२६ भदौ, काठमाडौं । अमेरिकी राष्ट्रपति डोनाल्ड ट्रम्पको प्रशासनले जागिर गुमाएका विदेशी कामदारलाई नयाँ रोजगारी वा नयाँ स्पन्सर खोज्न दिइँदै आएको ६० दिनको छुट सुविधा हटाउने प्रस्ताव गरेको छ।
प्रस्तावित नियममा एच–१बी भिसामा काम गरिरहेका दक्ष विदेशी कर्मचारीसहित अन्य अस्थायी वर्क भिसा भएका कामदारलाई समेत समेटिएको छ। अमेरिकी सरकारले बिहीबार अनलाइन सार्वजनिक गरेको सूचनामार्फत प्रस्तावित परिवर्तनबारे जानकारी दिएको हो।
अमेरिकी होमल्यान्ड सेक्युरिटी विभागले फेडरल रजिस्टरमा प्रकाशित गरेको प्रस्तावित नियमअनुसार एच–१बी तथा अन्य अस्थायी वर्क भिसा भएका कर्मचारीको रोजगारी समाप्त भएपछि उनीहरूले तत्काल अमेरिका छाड्नुपर्ने व्यवस्था गर्न खोजिएको छ।
हालको व्यवस्थाअनुसार निश्चित परिस्थितिमा जागिर गुमाएका एच–१बी भिसाधारीले नयाँ रोजगारदाता वा स्पन्सर खोज्न सीमित समय पाउँदै आएका छन्। प्रस्तावित परिवर्तन कार्यान्वयन भएमा यस्तो सुविधा हट्नेछ।
यसबाट ठूलो संख्यामा दक्ष विदेशी कर्मचारीमा निर्भर रहेका अमेरिकी प्रविधि कम्पनीलगायत व्यवसायमा असर पर्न सक्ने देखिएको छ। यद्यपि, होमल्यान्ड सेक्युरिटी विभागले प्रस्तावित परिवर्तनका कारण केही कम्पनीको काममा असर पर्न सक्ने स्वीकार गर्दै ती पदमा अमेरिकी कामदारलाई नियुक्त गर्न सकिने धारणा राखेको छ।
जनवरी २०२५ मा दोस्रोपटक सत्तामा फर्किएपछि ट्रम्प प्रशासनले कानुनी आप्रवासनलाई थप सीमित गर्ने विभिन्न कदम अघि बढाउँदै आएको छ। यसक्रममा दक्ष विदेशी कर्मचारीका लागि भिसा शुल्क बढाउने निर्णयसमेत गरिएको छ।
यसैबीच, नयाँ प्रशिक्षण कार्यक्रम लागू गर्ने प्रक्रियाका क्रममा विश्वभर रहेका अमेरिकी नियोगमा आप्रवासी भिसाका अपोइन्टमेन्टमा अस्थायी रोक लगाइएको जनाइएको छ।
प्रस्तावित नियमले विदेशी दक्ष कामदार, विशेषगरी एच–१बी भिसामा कार्यरत कर्मचारी र उनीहरूमा निर्भर अमेरिकी कम्पनीबीचको रोजगारीसम्बन्धी व्यवस्थामा महत्वपूर्ण परिवर्तन ल्याउन सक्ने देखिएको छ।
