काठमाडौं, १९ असोज — वर्तमान सरकार गठन भएयता पहिलो ६ महिनामा ग्रामीण काठमाडौं तथा दुर्गम क्षेत्रमा ३५.१६ किलोमिटर ग्रामीण सडक कालोपत्र गरिएको सरकारले जनाएको छ।
प्रधानमन्त्री तथा मन्त्रिपरिषद्को कार्यालयले सार्वजनिक गरेको सरकारको पहिलो ६ महिनाको उपलब्धि विवरणमा पूर्वाधार, ऊर्जा तथा कृषि विकासतर्फका प्रगति समेटिएका छन्।
यातायात तथा भवन पूर्वाधारअन्तर्गत ३५.१६ किलोमिटर ग्रामीण सडक कालोपत्र गर्नुका साथै १५ वटा सडक पुल र ४९ वटा झोलुङ्गे पुल निर्माण सम्पन्न गरिएको उल्लेख छ।
यस्तै, नागढुंगा सुरुङमार्ग परीक्षणका रूपमा सञ्चालनमा ल्याइएको छ। काठमाडौं–तराई/मधेश द्रुतमार्गको भौतिक प्रगति ५०.०२ प्रतिशत पुगेको र महादेवटार सुरुङमार्गको ‘ब्रेक थ्रु’ सम्पन्न भएको सरकारले जनाएको छ।
आन्दोलनका क्रममा क्षति पुगेका १३३ वटा सरकारी भवनको मर्मत तथा प्रबलीकरणसमेत सम्पन्न गरिएको विवरणमा उल्लेख छ।
ऊर्जा, जलस्रोत तथा सिँचाइतर्फ कुल विद्युत् जडित क्षमता ४ हजार २५८ मेगावाट पुगेको जनाइएको छ। पछिल्लो ६ महिनामा मात्रै १६१ मेगावाट विद्युत् प्रणालीमा थप भएको सरकारले जनाएको छ।
चालु आर्थिक वर्षमा १ हजार १९६ गिगावाट घण्टा विद्युत् निर्यात गरी करिब १० अर्ब रुपैयाँ बराबरको विदेशी मुद्रा आर्जन गरिएको विवरणमा उल्लेख छ। यस्तै, ६ महिनामा थप २ हजार ९४८ हेक्टर जमिनमा सिँचाइ सुविधा विस्तार गरिएको छ।
कृषि तथा वन क्षेत्रतर्फ ६५ हजार ६०० उखु उत्पादक किसानलाई २ अर्ब १७ करोड रुपैयाँभन्दा बढी प्रोत्साहन अनुदान वितरण गरिएको छ। बाली तथा पशुधन बीमा प्रिमियममा १ अर्ब २४ करोड रुपैयाँ अनुदान उपलब्ध गराइएको तथा २ लाख ५८ हजार मेट्रिक टन रासायनिक मल बिक्री वितरण गरिएको सरकारले जनाएको छ।
यस अवधिमा २६ लाख ७७ हजारभन्दा बढी किसान कृषि तथा किसान सूचीकरण प्रणालीमा दर्ता भएका छन्।
त्यसैगरी, कार्बन व्यापारमार्फत विश्व बैंकबाट ९.४ मिलियन अमेरिकी डलर अर्थात् करिब १ अर्ब ३४ करोड रुपैयाँ वन विकास कोषमा प्राप्त भएको विवरणमा उल्लेख छ।
