काठमाडौं । सरकार सञ्चालन र नीतिगत विषयमा नागरिकले आफ्ना कुरा सिधै राख्न पाउने गरी राष्ट्रिय स्वतन्त्र पार्टी (रास्वपा) ले सञ्चालन गरिरहेको संवाद कार्यक्रमअन्तर्गत गृहमन्त्री सुधन गुरुङ नागरिकसँग प्रत्यक्ष भेटघाट गर्ने भएका छन्।
रास्वपाले सञ्चालन गर्दै आएको ‘नागरिक, नीति र नेतृत्व’ कार्यक्रमअन्तर्गत गृहमन्त्री गुरुङ सोमबार पार्टीको केन्द्रीय कार्यालयमा नागरिकसँग संवादमा सहभागी हुने भएका हुन्।
सोमबार साँझ ५ बजेपछि हुने कार्यक्रममा सहभागी नागरिकले आफूले भोगिरहेका समस्या, सरकारी सेवासँग जोडिएका गुनासा, विभिन्न सुझाव तथा सरकारबाट गर्नुपर्ने अपेक्षा गृहमन्त्रीसमक्ष प्रत्यक्ष राख्न पाउनेछन्।
रास्वपाका अनुसार कार्यक्रम केवल गुनासा सुन्ने औपचारिकतामा सीमित हुने छैन। नागरिकले उठाएका विषयलाई त्यसपछि मन्त्री, सांसद र पार्टीको केन्द्रीय नेतृत्वबीच हुने छलफलमा समेत लैजाने तयारी छ।
कार्यक्रमको पहिलो चरणमा नागरिकसँग प्रत्यक्ष संवाद हुनेछ। दोस्रो चरणमा भने नागरिकबाट आएका सुझाव तथा गुनासामाथि मन्त्री, सांसद र पार्टी नेतृत्वबीच समसामयिक तथा नीतिगत विषयमा छलफल गरिनेछ।
पार्टीले पछिल्लो समय नागरिक र नेतृत्वबीचको दूरी घटाउने उद्देश्यसहित ‘नागरिक, नीति र नेतृत्व’ कार्यक्रम सञ्चालन गरिरहेको जनाएको छ। नागरिकले आफ्ना कुरा नेतासम्म पुर्याउने मात्र नभई ती विषय नीति निर्माणको तहसम्म पुग्ने वातावरण बनाउन कार्यक्रमलाई निरन्तरता दिइएको रास्वपाको भनाइ छ।
