दक्षिण कोटाबाटो । फिलिपिन्सको मिन्डानाओस्थित एक विद्यालयमा गोली चल्दा दुई विद्यार्थीसहित कम्तीमा तीन जनाको मृत्यु भएको छ। घटनामा केही विद्यार्थी घाइते भएका छन् भने घाइतेमध्ये केहीलाई उपचारका लागि अस्पताल लगिएको छ।
फिलिपिन्स राष्ट्रिय प्रहरीले घटनामा तीन जनाको मृत्यु भएको पुष्टि गरेको छ। मृतकमध्ये एक जना संदिग्ध बन्दुकधारी रहेको बताइएको छ।
स्थानीय समयअनुसार शुक्रबार दिउँसो करिब १ः३० बजे दक्षिण कोटाबाटो प्रान्तको बांगा नेसनल हाईस्कुलमा गोली चलेको हो। दक्षिण कोटाबाटोका गभर्नर रेनाल्डो तामायोका अनुसार मृत्यु हुने दुई विद्यार्थी १४ वर्षीय छात्र र १४ वर्षीया छात्रा हुन्।
घटनाको कारणबारे प्रहरीले तत्काल कुनै जानकारी सार्वजनिक गरेको छैन। प्रहरीले घटनाबारे अनुसन्धान भइरहेको जनाएको छ।
घटनास्थलमा पुगेका प्रहरी अधिकारीहरूले विद्यालय क्षेत्रलाई सुरक्षित बनाउँदै प्रशासन तथा स्वास्थ्यकर्मीसँग समन्वय गरी प्रभावित विद्यार्थी र कर्मचारीलाई सहयोग गरिरहेका छन्।
एएफपीले प्रमाणीकरण गरेको सामाजिक सञ्जालमा सार्वजनिक भिडियोमा एक पुरुषले विद्यालयबाट घाइते बालकलाई बोकेर बाहिर ल्याउँदै गरेको देखिन्छ। अर्को भिडियोमा एक शिक्षिकाले स्थानीय भाषामा दुई जना बन्दुकधारी रहेको बताएको सुनिन्छ। एक विद्यार्थीले भने उनीहरू बाहिरबाट आएका व्यक्ति भएको बताएका छन्।
फिलिपिन्समा पछिल्ला विद्यालय गोलीकाण्ड
फिलिपिन्समा पछिल्लो समय विद्यालय तथा शैक्षिक संस्थामा गोली चलाएका घटनाहरू पनि सार्वजनिक भएका छन्। अगस्टमा एक निजी विश्वविद्यालय परिसरमा हाईस्कुलका एक विद्यार्थीले गोली चलाउँदा एक विद्यार्थीको मृत्यु भएको थियो भने दुई जना घाइते भएका थिए। घटनापछि बन्दुकधारीले आफैंलाई गोली हानेका थिए।
यसअघि जुनमा पूर्वी फिलिपिन्सको टाक्लोबान सहरमा भएको अर्को विद्यालय गोलीकाण्डमा तीन विद्यार्थीको मृत्यु भएको थियो भने करिब २० जना घाइते भएका थिए।
