काठमाडौँ, २ कात्तिक। बडादसैँका अवसरमा सर्वसाधारणको आवतजावत सहज बनाउन सशस्त्र प्रहरी बल नेपालले काठमाडौँ उपत्यकामा दुईवटा निःशुल्क बस सञ्चालन गरेको छ।
दसैँका बेला सार्वजनिक यातायातका साधन न्यून सङ्ख्यामा सञ्चालन हुने भएकाले यात्रुलाई सुविधा पुर्याउने उद्देश्यले निःशुल्क बस सेवा सुरु गरिएको सशस्त्र प्रहरी बल नेपालका सहप्रवक्ता शैलेन्द्र थापाले जानकारी दिए।
सोमबारदेखि तीन दिनसम्म सञ्चालन हुने उक्त सेवा बिहान ८ बजेदेखि बेलुका ६ बजेसम्म उपलब्ध हुनेछ।
सशस्त्र प्रहरी बलको हल्चोकस्थित प्रधान कार्यालयबाट छुट्ने पहिलो बसले बालाजु, नयाँ बसपार्क, कोटेश्वर, सातदोबाटो र बल्खुलगायत क्षेत्रका यात्रुलाई सेवा दिनेछ।
त्यस्तै, प्रधान कार्यालयबाटै छुट्ने दोस्रो बसले सीतापाइला, कलङ्की, बल्खु, कोटेश्वर र नयाँ बसपार्कलगायत क्षेत्रका यात्रुलाई निःशुल्क सेवा प्रदान गर्नेछ।
दसैँका बेला सार्वजनिक यातायातको अभावमा आवतजावत गर्न कठिनाइ हुने सर्वसाधारणलाई लक्षित गरी सञ्चालन गरिएको यस सेवाबाट उपत्यकाभित्र यात्रा गर्ने नागरिक लाभान्वित हुने अपेक्षा गरिएको छ।
