काठमाडौं — भोटेकोशी बाढीपहिरोमा परी ज्यान गुमाउनेमध्ये हालसम्म १ हजार ३ सय ५५ जनाको शव फेला परेको छ भने ४ हजार ९ सय १६ जना अझै सम्पर्कविहीन रहेको राष्ट्रिय विपद् जोखिम न्यूनीकरण तथा व्यवस्थापन प्राधिकरणले जनाएको छ।
प्राधिकरणले सोमबार बिहान ११ बजेसम्म सार्वजनिक गरेको पछिल्लो विवरणअनुसार फेला परेका शवमध्ये सबैभन्दा धेरै चितवनमा ३ सय ६३ जना रहेका छन्। त्यस्तै नवलपरासी पूर्वमा २२२, नवलपरासी पश्चिममा २२१, नुवाकोटमा १९७ र रसुवामा १६९ जनाको शव फेला परेको छ।
यसैगरी गोरखामा ७५, धादिङमा ७० र तनहुँमा ३८ जनाको शव फेला परेको प्राधिकरणले जनाएको छ। फेला परेका शवमध्ये केहीमा पूर्ण शव नभई विभिन्न मानव अङ्गहरू मात्र समेत समावेश छन्।
प्राधिकरणका अनुसार हालसम्म फेला परेका शवमध्ये ९८ जनाको सनाखत गरी परिवारलाई बुझाइसकिएको छ।
नुवाकोट र रसुवामा हजारौँ सम्पर्कविहीन
बाढीपहिरोपछि अझै ४ हजार ९ सय १६ जना सम्पर्कविहीन रहेको विवरणमा उल्लेख छ। जिल्ला प्रशासन कार्यालय रसुवाको विवरणअनुसार १ हजार ९ सय ६७ जना र नुवाकोटको विवरणअनुसार २ हजार ३ सय ४० जना नेपाली नागरिक सम्पर्कविहीन छन्।
यसका अतिरिक्त करिब १ सय सुरक्षाकर्मी तथा कर्मचारी र ५ सय ९ जना विदेशी नागरिक समेत अझै सम्पर्कमा आउन नसकेको प्राधिकरणले जनाएको छ।
यद्यपि सम्पर्कविहीनको सूचीमा पहिचान हुन बाँकी शव तथा यसअघि नै उद्धार भइसकेका व्यक्तिहरू समेत परेको हुनसक्ने भएकाले विवरण रुजु गर्ने काम तीव्र रूपमा भइरहेको प्राधिकरणले स्पष्ट पारेको छ।
१३ हजारभन्दा बढीको उद्धार
प्रभावित क्षेत्रबाट हालसम्म १३ हजार ३ सय ९६ जनाको सुरक्षित उद्धार गरिएको छ। उद्धार गरिएकाहरूलाई अस्थायी आश्रय दिन विभिन्न स्थानमा ३१ वटा होल्डिङ सेन्टर स्थापना गरिएको छ।
ती केन्द्रमा हाल ३ हजार ५ सय ३३ जना आश्रित रहेका छन्। नुवाकोटका होल्डिङ सेन्टरमा २ हजार ६ सय ५१, रसुवामा ६ सय ६९ र धादिङमा २ सय १३ जना रहेका छन्।
६ हजार ६ सय ७२ घाइतेको उपचार
बाढीपहिरोमा परी घाइते भएका ६ हजार ६ सय ७२ जनाको उपचार गरिएको प्राधिकरणले जनाएको छ।
उपचार गरिएकामध्ये नेपाली सेनाले ३ हजार ३ सय ७९ जना र सशस्त्र प्रहरी बलले २ हजार ९ सय ७० जनाको उपचार गरेको छ।
विभिन्न अस्पतालमा उपचार गराएका ३ सय २३ जनामध्ये २ सय २८ जना निको भएर डिस्चार्ज भइसकेका छन्।
इन्धन र ग्यासको व्यवस्था
प्रभावित क्षेत्रमा इन्धनको उपलब्धता सहज बनाउन ५८ हजार लिटर डिजेल, २५ हजार लिटर पेट्रोल र १३ हजार लिटर हवाई इन्धन मौज्दात राखिएको प्राधिकरणले जनाएको छ।
त्यस्तै प्रभावित क्षेत्रमा आवश्यकताअनुसार ४५७ वटा ग्यास सिलिन्डर अनुदानमा पठाइएको छ।
विद्युत् र सञ्चार सेवा पुनः सञ्चालनमा
बाढीपहिरोबाट प्रभावित क्षेत्रमा अवरुद्ध आधारभूत पूर्वाधार सञ्चालन गर्ने काम तीव्र पारिएको छ। प्राधिकरणका अनुसार धादिङमा ९९.८ प्रतिशत, नुवाकोटमा ९६.७ प्रतिशत र रसुवामा ७८ प्रतिशत घरधुरीमा विद्युत् आपूर्ति पुनः सञ्चालन भइसकेको छ।
सञ्चार सेवातर्फ नेपाल टेलिकमका कुल १२० टावरमध्ये ११७ वटा र एनसेलका ७८ टावरमध्ये ७६ वटा सञ्चालनमा आइसकेका छन्।
१५० जना मनोसामाजिक परामर्शदाता परिचालन
विपद्बाट विस्थापित तथा प्रभावित नागरिकको मानसिक स्वास्थ्यलाई ध्यानमा राख्दै स्वास्थ्य मन्त्रालयमार्फत १५० जना मनोसामाजिक परामर्शदाता प्रभावित क्षेत्रमा परिचालन गरिएको प्राधिकरणले जनाएको छ।
विपद्पछि आफन्त गुमाएका, बेपत्ता भएका परिवार तथा विस्थापित नागरिकमा देखिन सक्ने मानसिक तनाव र मनोसामाजिक समस्यालाई सम्बोधन गर्न परामर्श तथा आवश्यक सहयोग उपलब्ध गराउने काम भइरहेको प्राधिकरणको भनाइ छ।
बाढीपहिरोपछि उद्धार, उपचार, राहत वितरण तथा अवरुद्ध पूर्वाधार पुनः सञ्चालनलाई प्राथमिकतामा राखिएको छ। साथै बेपत्ता नागरिकको खोजी तथा फेला परेका शवको पहिचान गर्ने कामलाई समेत तीव्र बनाइएको प्राधिकरणले जनाएको छ।
