काठमाडौं, २७ असोज। परराष्ट्रमन्त्री शिशिर खनाल र नेपालका लागि दक्षिण अफ्रिकाका गैरआवासीय राजदूत प्रा. अनिल सुकलालबीच नेपाल–दक्षिण अफ्रिका द्विपक्षीय सम्बन्धलाई थप सुदृढ बनाउने विषयमा छलफल भएको छ।
परराष्ट्रमन्त्री खनालसँग राजदूत सुकलालले शिष्टाचार भेटवार्ता गरेका हुन्। भेटका क्रममा दुवै पक्षले आर्थिक तथा लगानी सहकार्य अभिवृद्धि गर्ने, दक्षिण–दक्षिण सहकार्यलाई प्रवर्द्धन गर्ने र बहुपक्षीयतालाई थप सुदृढ बनाउने विषयमा विचार आदानप्रदान गरेका थिए।
भेटमा नेपालमा हालै आएको विनाशकारी बाढीबाट उत्पन्न परिस्थितिबारे समेत छलफल भएको थियो। जलवायु परिवर्तनका कारण जोखिममा रहेका मुलुकका समस्या र चुनौतीलाई अन्तर्राष्ट्रिय समुदायसमक्ष प्रभावकारी रूपमा उठाउनुपर्ने आवश्यकतामा दुवै पक्षले जोड दिएका थिए।
जलवायु परिवर्तनविरुद्धको विश्वव्यापी प्रयासलाई थप प्रभावकारी बनाउन जोखिममा रहेका मुलुकको आवाज अन्तर्राष्ट्रिय मञ्चहरूमा सशक्त रूपमा प्रस्तुत गर्नुपर्नेमा उनीहरू सहमत भएका थिए।
त्यसैगरी, जलवायु परिवर्तनबाट उत्पन्न चुनौतीको सामना गर्न अन्तर्राष्ट्रिय सहकार्य विस्तार गर्नुपर्नेमा पनि दुवै पक्षले जोड दिएका थिए।
नेपाल र दक्षिण अफ्रिकाबीच आर्थिक, लगानी तथा बहुपक्षीय सहकार्यलाई थप विस्तार गर्ने सम्भावनाबारे भएको यस छलफललाई द्विपक्षीय सम्बन्ध सुदृढ बनाउने प्रयासका रूपमा हेरिएको छ।
