काठमाडौं । भदौ १० गते रसुवाको भोटेकोशीमा आएको विनाशकारी बाढीमा परेर बेपत्ता भएका पत्रकार निराजन पौडेलका परिवारका पाँच सदस्यको एक सातासम्म खोजी गर्दा पनि अवस्था पत्ता नलागेपछि परिवारले अन्तिम संस्कार गर्ने निर्णय गरेको छ।
बाढीपछि पौडेलका बुवा वासुदेव, आमा गोमा, काका हिमालय, काकी उमा र बहिनी हिमानी सम्पर्कविहीन भएका थिए। विभिन्न स्थानमा खोजी गर्दा पनि उनीहरूको अवस्था पत्ता नलागेपछि परिवारले बुधबारदेखि अन्तिम संस्कारको प्रक्रिया अघि बढाएको हो।
पत्रकार पौडेलले सामाजिक सञ्जालमार्फत परिवारका सदस्यहरूको खोजी गर्दा पनि नभेटिएपछि अन्तिम संस्कार गर्ने निर्णयमा पुगेको जानकारी दिएका छन्।
पौडेलले सामाजिक सञ्जालमा लेखेका छन्, “गत भदौ १० गते आएको भोटेकोशी बाढीमा परेर बेपत्ता हुनुभएका हाम्रा अभिभावक बुवा, आमा, अंकल, अन्टी र बहिनीको खोजी गर्दा पनि नभेटिएपछि आजदेखि हामी अन्तिम संस्कार गर्ने निर्णयमा पुगेका छौँ।”
पौडेलका परिवारको अन्तिम संस्कार काठमाडौंको तारकेश्वर नगरपालिका–लोलाङ बोहोराटार गेटबाट सुनौलो बस्ती जाने बाटोमा रहेको रुद्रमती महादेव मन्दिर तथा किरियापुत्री भवनमा गरिएको हो।
नुवाकोटको विदुर नगरपालिका–७ स्थायी ठेगाना भएका पौडेलको परिवार भोटेकोशीमा आएको बाढीपछि सम्पर्कविहीन भएको थियो। यसअघि पौडेलले आफ्ना परिवारका सदस्यको खोजी तथा उद्धारका लागि सहयोग गरिदिन सबैसँग सार्वजनिक रूपमा आग्रह गरेका थिए।
उनले त्यसबेला भनेका थिए, “बुवा, ममी, अंकल, अन्टी र बहिनीको खोजी गरिदिनुहुन सबैसँग आग्रह गर्दछु।”
भोटेकोशी बाढीका कारण रसुवा, नुवाकोट, धादिङ, गोरखालगायतका नदी तथा तटीय क्षेत्र प्रभावित भएका छन्। बाढीपछि सुरक्षा निकाय तथा विभिन्न उद्धार टोलीले बेपत्ताको खोजी जारी राखे पनि सबै बेपत्ताको अवस्था अझै यकिन हुन सकेको छैन।
