कप्तानगञ्ज, सुनसरी — घटना घटेको केही दिन बितिसक्दा पनि सुनसरीको कप्तानगञ्जस्थित मुस्लिम टोलको जनजीवन सामान्य बन्न सकेको छैन। तनावपूर्ण अवस्थाका कारण बस्तीमा खाद्यान्नलगायत दैनिक उपभोग्य वस्तुको आपूर्ति प्रभावित भएपछि स्थानीय सर्वसाधारण र मदरसामा अध्ययनरत बालबालिका गम्भीर समस्यामा परेका छन्।
स्थानीयका अनुसार घटनापछि सिर्जिएको तनावसँगै बस्ती वरपरका आवतजावत गर्ने बाटाहरू अवरुद्ध भएका छन्। बाहिरबाट सामान ल्याउन नसक्दा र स्थानीय पसलहरूबाट समेत आवश्यक सामग्री सहज रूपमा उपलब्ध हुन छाडेपछि बस्तीमा दैनिक छाक टार्ने खाद्यान्नदेखि औषधिसम्मको अभाव देखिन थालेको छ।
विशेषगरी मदरसामा रहेका साना बालबालिकाको अवस्था चिन्ताजनक बन्दै गएको स्थानीयको भनाइ छ। बालबालिकाका लागि आवश्यक खाद्यान्न तथा अन्य दैनिक उपभोग्य सामग्रीको आपूर्ति प्रभावित हुँदा उनीहरू प्रत्यक्ष रूपमा समस्यामा परेका छन्।
“पसलबाट सामान पाउन छाडेको छ। बाहिर जाने बाटो पनि बन्द छ। मदरसामा रहेका साना बालबालिका र घरपरिवारलाई खाद्यान्नको ठूलो समस्या भइसकेको छ,” एक स्थानीयले भने।
बाटो बन्द भएपछि दैनिक जीवन कष्टकर
बस्तीलाई बाहिरी क्षेत्रसँग जोड्ने बाटाघाटा अवरुद्ध भएपछि अत्यावश्यक कामका लागि बाहिर निस्कनसमेत स्थानीयलाई कठिनाइ भएको छ। खाद्यान्न, औषधि तथा अन्य आवश्यक सामग्री खरिद गर्न नसक्दा सर्वसाधारणमा थप चिन्ता बढेको छ।
स्थानीयका अनुसार अहिलेको अवस्था लामो समयसम्म कायम रहेमा खाद्यान्न संकट अझ गम्भीर बन्न सक्ने जोखिम छ। विशेषगरी बालबालिका, वृद्धवृद्धा, बिरामी तथा दैनिक ज्यालादारीमा निर्भर परिवार बढी प्रभावित हुने देखिएको छ।
“विवादको असर निर्दोष नागरिकमाथि नपरोस्”
स्थानीयले जुनसुकै कारणबाट तनाव सिर्जना भएको भए पनि त्यसको असर निर्दोष नागरिक र बालबालिकाको जीवनमा पर्न नहुने बताएका छन्।
उनीहरूले मानवीय आधारमा आवतजावत सहज बनाउन, खाद्यान्न तथा औषधिको आपूर्ति तत्काल खुलाउन र बस्तीमा सामान्य जनजीवन फर्काउने वातावरण बनाउन स्थानीय प्रशासनसँग माग गरेका छन्।
प्रशासन भन्छ– अवस्था सामान्य बनाउने प्रयास भइरहेको छ
क्षेत्रमा सुरक्षा व्यवस्था कडा पारिएको भए पनि आवतजावत तथा दैनिक आपूर्ति सहज हुन नसक्दा सर्वसाधारणको जनजीवन प्रभावित भएको छ।
स्थानीय प्रशासनले भने अवस्था सामान्य बनाउन तथा खाद्यान्नलगायत अत्यावश्यक सामग्रीको सहज आपूर्ति सुनिश्चित गर्न आवश्यक पहल भइरहेको जनाएको छ।
तनाव र विवादको मूल्य निर्दोष नागरिक तथा मदरसाका बालबालिकाले भोक र अभावमार्फत चुकाउनुपर्ने अवस्था आउन नदिन तत्काल मानवीय पहल आवश्यक देखिएको छ।
