२७ भदौ, गुल्मी । गुल्मीमा जंगली जनावर धपाउन बारीमा छोडिएको करेन्टमा परेर एक महिलाको मृत्यु भएको छ।
मदाने गाउँपालिका–१ ओख्लेदहमा बारीमा नांगो तारमार्फत छोडिएको करेन्ट लागेर मदाने गाउँपालिका–४ की ४८ वर्षीया डालकुमारी खत्रीको मृत्यु भएको हो।
जिल्ला प्रहरी कार्यालय गुल्मीका सूचना अधिकारी प्रहरी नायब उपरीक्षक वीरेन्द्र विश्वकर्माका अनुसार बारीधनी सन्तबहादुर बिष्टले जंगली जनावर धपाउन नांगो तारमा करेन्ट प्रवाह गरेका थिए। सोही करेन्टमा परेर खत्रीको मृत्यु भएको प्रहरीले जनाएको छ।
खत्री नातिसहित भतिजीको घरमा जाने क्रममा ओख्लेदह पुगेकी थिइन्। त्यसपछि उनी सम्पर्कविहीन भएपछि परिवारले खोजीका लागि प्रहरीलाई खबर गरेको थियो। खोजी गर्ने क्रममा उनी करेन्ट लागेको अवस्थामा फेला परेकी थिइन्।
घटनापछि प्रहरीले घटनास्थलको मुचुल्का तयार गरी शवलाई पोस्टमार्टमका लागि गुल्मी अस्पताल पठाएको छ।
बारीमा करेन्ट छोडेको आरोपमा प्रहरीले सन्तबहादुर बिष्टलाई नियन्त्रणमा लिएर घटनाबारे थप अनुसन्धान गरिरहेको जनाएको छ।
