गण्डकी। पोखरा अन्तर्राष्ट्रिय विमानस्थल र पुरानो पोखरा विमानस्थलमा हवाई आवागमन हुने तथा आसपासका क्षेत्रमा चङ्गा, ड्रोन, बेलुन उडाउन र लेजर लाइट प्रयोग गर्न निषेध गरिएको छ।
पोखरा अन्तर्राष्ट्रिय विमानस्थलका प्रमुख जगन्नाथ निरौलाका अनुसार यस्ता गतिविधिले विमानको उडान सुरक्षामा गम्भीर असर पार्न सक्ने भएकाले सार्वजनिक रूपमा सूचना जारी गरी सबैलाई सचेत गराइएको हो।
विमानस्थल आसपासका क्षेत्रमा जथाभावी फोहोरमैला फाल्ने तथा नहरमा मृत पशुपन्छी बगाउनेजस्ता गतिविधि नगर्न पनि आग्रह गरिएको छ। यस्ता कार्यले चराचुरुङ्गी तथा अन्य वन्यजन्तुको गतिविधि बढाउन सक्ने र त्यसले विमानको उडान तथा अवतरणमा जोखिम निम्त्याउन सक्ने विमानस्थल कार्यालयले जनाएको छ।
विमानस्थलले फोहोरमैला तथा मृत पशुपन्छीको उचित व्यवस्थापन गर्न सम्बन्धित सबैलाई अनुरोध गरेको छ।
सूचनाको अवज्ञा गरी निषेधित गतिविधि गरेको पाइएमा प्रचलित कानुनबमोजिम कडा कारबाही गरिने पोखरा अन्तर्राष्ट्रिय विमानस्थल नागरिक उड्डयन कार्यालयले जनाएको छ।
