काठमाडौँ — नेपाल राष्ट्र बैंकले दसैँलगायतका चाडपर्वलाई लक्षित गर्दै बैंक तथा वित्तीय संस्थालाई एटीएम मेसिनबाटै १०० रुपैयाँका नयाँ नोट उपलब्ध गराउन निर्देशन दिएको छ।
राष्ट्र बैंकको निर्देशनसँगै केही बैंक तथा वित्तीय संस्थाले नयाँ प्रविधियुक्त एटीएममार्फत १०० रुपैयाँका नोट वितरण गर्न थालेका छन्।
नेपाल राष्ट्र बैंकका प्रवक्ता गुरुप्रसाद पौडेलका अनुसार भोटेकोशी बाढीबाट ठूलो जनधनको क्षति भएको अवस्थामा नयाँ नोटको विषयमा अनावश्यक प्रचारप्रसार नगरी चाडपर्वका लागि राष्ट्र बैंक तथा वाणिज्य बैंकमार्फत सुकिला र सफा नोट उपलब्ध हुने व्यवस्था गरिएको हो।
उनका अनुसार पैसा सटही गर्नु नियमित काम भएकाले यसका लागि छुट्टै प्रचार वा सूचना जारी गर्न आवश्यक नरहेको राष्ट्र बैंकको बुझाइ छ। चाडपर्वको मुखमा भोटेकोशी बाढीबाट ठूलो क्षति भएकाले दसैँका लागि नयाँ नोट वितरणसम्बन्धी औपचारिक सूचना जारी नगरी आवश्यक व्यवस्था मिलाइएको उनले बताए।
प्रवक्ता पौडेलले असोज १ गतेदेखि राष्ट्र बैंकको थापाथलीस्थित कार्यालय, प्रादेशिक कार्यालय तथा वाणिज्य बैंकहरूबाट सुकिला र सफा नोट उपलब्ध गराउने व्यवस्था भइरहेको जानकारी दिए।
राष्ट्र बैंकले विगत चार–पाँच वर्षदेखि चाडपर्व लक्षित नयाँ नोट बजारमा ल्याउने परिपाटीलाई क्रमशः न्यूनीकरण गर्ने प्रयास गरिरहेको पनि पौडेलले बताए।
उनका अनुसार भदौ ३१ गतेसम्म नेपालमा ७ खर्ब ९४ अर्ब रुपैयाँ बराबरको करेन्सी इन सर्कुलेसन रहेको छ। दसैँको समयमा उक्त रकम करिब ८ देखि १० प्रतिशतसम्म बढ्ने राष्ट्र बैंकको अनुमान छ।
