मकवानपुर – भारी वर्षाको सम्भावनालाई ध्यानमा राख्दै नेपाली कांग्रेसको १५औँ महाधिवेशनअन्तर्गत मकवानपुरमा तय भएका प्रदेशसभा र प्रतिनिधिसभा क्षेत्रीय अधिवेशनको मिति परिवर्तन गरिएको छ।
जिल्ला निर्वाचन अधिकृत अधिवक्ता राजकुमार उप्रेतीले शुक्रबार सूचना जारी गर्दै मौसम पूर्वानुमान महाशाखाको सूचनाका साथै नेपाली कांग्रेस केन्द्रीय निर्वाचन समितिको असोज ८ गतेको प्रेस विज्ञप्तिका आधारमा अधिवेशनको मिति सारिएको जानकारी दिएका हुन्।
नयाँ कार्यतालिकाअनुसार शनिबार हुने भनिएको प्रदेशसभा क्षेत्रीय अधिवेशन अब असोज १३ गते हुनेछ भने प्रतिनिधिसभा क्षेत्रीय अधिवेशन असोज १४ गते आयोजना गरिनेछ।
भारी वर्षाको सम्भावनालाई दृष्टिगत गर्दै कांग्रेसले अन्य जिल्लामा पनि शनिबारका लागि तय गरिएका प्रदेशसभा तथा प्रतिनिधिसभा क्षेत्रीय अधिवेशनका निर्वाचन कार्यक्रमहरू आवश्यकता अनुसार पुनःनिर्धारण गरेको जनाएको छ।
