काठमाडौं —
रसुवाको भोटेकोशीमा बुधबार आएको बाढीपछि सम्पर्कविहीन भएका ७४३ पर्यटकमध्ये हालसम्म १२१ जनाको उद्धार गरिएको छ। अझै ६२२ जना पर्यटक सम्पर्कविहीन रहेको नेपाल पर्यटन बोर्डले जनाएको छ।
नेपाल पर्यटन बोर्डका निमित्त प्रमुख कार्यकारी अधिकृत (सीईओ) हिक्मतसिंह ऐरका अनुसार विभिन्न कम्पनीमार्फत गोसाइँकुण्ड तथा कैलाश मानसरोवर गएका ६२२ पर्यटक अझै सम्पर्कमा आउन सकेका छैनन्।
सम्पर्कविहीन पर्यटकमध्ये नेपालका १४९, भारतका ९८, अमेरिकाका ६५, युक्रेनका ६१, मलेसियाका ५१ र चीनका ८ जना रहेका छन्। त्यस्तै, अष्ट्रेलिया, बेलायत, क्यानडा, लाटभियालगायत विभिन्न ३६ देशका पर्यटक पनि सम्पर्कविहीन रहेको बोर्डले जनाएको छ।
यसैगरी, उद्धार गरिएका पर्यटकमध्ये भारतका ८५, चीनका १६, दक्षिण कोरियाका ९, अमेरिका, रुस र इटालीका २/२ तथा बेल्जियम, पोर्चुगल, स्पेन, बुल्गेरिया र स्वीजरल्यान्डका १/१ जना रहेको पर्यटन बोर्डले जनाएको छ।
संस्कृति, पर्यटन तथा नागरिक उड्डयन मन्त्रालय, नेपाल पर्यटन बोर्ड, पर्यटक प्रहरी तथा पर्यटन क्षेत्रसँग सम्बन्धित अन्य निकायले प्रभावित क्षेत्रमा रहेका पर्यटकको खोज तथा उद्धार कार्यलाई तीव्रता दिएका छन्।
घाइते तथा विभिन्न स्थानमा अलपत्र परेका पर्यटकलाई सुरक्षित स्थानमा ल्याउन आवश्यक समन्वय र उद्धार प्रयास भइरहेको बोर्डले जनाएको छ।
नेपाल पर्यटन बोर्डले ‘पर्यटकको सुरक्षा हाम्रो पहिलो प्राथमिकता हो’ भन्दै प्रभावित क्षेत्रमा रहेका पर्यटक तथा उनीहरूका परिवारलाई धैर्य र सतर्क रहन आग्रह गरेको छ।
बोर्डले पर्यटकसम्बन्धी जानकारी वा सहयोग आवश्यक परे टोल फ्री नम्बर १२३४, हटलाइन नम्बर ११४४ तथा पर्यटन प्रहरीको ९८५१२८९४४५ मा सम्पर्क गर्न आग्रह गरेको छ।
