काठमाडौं । नेपाली कम्युनिस्ट पार्टी (नेकपा) की सांसद बलावती शर्माले भारतमा सम्पन्न ब्रिक्स सम्मेलनमा नेपाललाई निम्तो नदिइएको विषयमा सरकारसँग प्रश्न गरेकी छन्।

प्रतिनिधिसभाको शून्य समयमा बोल्दै सांसद शर्माले छिमेकी भारतमा आयोजित ब्रिक्स सम्मेलनमा नेपालको सहभागिता हुन नसकेको विषयमा सरकारको ध्यानाकर्षण गराइन्।

‘सरकारलाई म सोध्न चाहन्छु, छिमेकमै भएको ब्रिक्सको निम्तोबाट नेपाल किन चुक्यो ? के यो परराष्ट्र नीति र कूटनीतिको असफलता होइन र ?’ उनले प्रश्न गरिन्।

नेपाल ब्रिक्सको सदस्य राष्ट्र होइन। यस वर्षको १८औँ ब्रिक्स शिखर सम्मेलन भारतको नयाँ दिल्लीमा सेप्टेम्बर १२ र १३ मा आयोजना भएको थियो। सम्मेलनमा ब्रिक्सका सदस्य तथा साझेदार मुलुकका प्रतिनिधिहरू सहभागी भएका थिए।

यसअघि सन् २०१६ मा भारतको गोवामा आयोजित आठौँ ब्रिक्स शिखर सम्मेलनसँगै BRICS-BIMSTEC Outreach Summit आयोजना गरिएको थियो। उक्त कार्यक्रममा तत्कालीन प्रधानमन्त्री पुष्पकमल दाहाल ‘प्रचण्ड’ सहभागी भएका थिए। परराष्ट्र मन्त्रालयको अभिलेखअनुसार प्रचण्डले सो अवसरमा ब्रिक्स र बिमस्टेकबीच सहकार्य तथा विकासका विषयमा सम्बोधन गरेका थिए।

२०१६ को गोवा सम्मेलनमा नेपालसहित बिमस्टेक सदस्य राष्ट्रका नेताहरूलाई सहभागी गराइएको थियो। त्यस क्रममा प्रचण्डले ब्रिक्स र बिमस्टेकबीच सहकार्यलाई थप विस्तार गर्नुपर्ने धारणा राखेका थिए।

तर यसपटक भारतमा आयोजित ब्रिक्स सम्मेलनमा नेपाल सहभागी हुन पाएन। नेपालको सहभागिता नहुनुको विषयमा राजनीतिक वृत्तमा बहस भइरहेका बेला सांसद शर्माले सरकारको कूटनीतिक पहलमाथि प्रश्न उठाएकी हुन्।

हालसम्म सार्वजनिक विवरणअनुसार नेपाल ब्रिक्सको सदस्य वा साझेदार राष्ट्र होइन। यस वर्षको सम्मेलनमा सहभागी हुने मुलुकको संरचना २०१६ को BRICS-BIMSTEC Outreach ढाँचाभन्दा फरक थियो।