काठमाडौं — आगामी खेती सिजनमा किसानले रासायनिक मलको अभाव झेल्न नपरोस् भन्ने उद्देश्यले सरकारले मल खरिद तथा आपूर्तिको पूर्वतयारी तीव्र बनाएको छ।
कृषि, वन तथा पर्यावरण मन्त्रालयले समयमै मलको सहज आपूर्ति सुनिश्चित गर्न खरिद प्रक्रिया अघि बढाएको जनाएको छ। मन्त्रालयका अनुसार मल खरिदका लागि अर्थ मन्त्रालयबाट १० अर्ब रुपैयाँ बराबरको स्रोत सुनिश्चितता प्राप्त भइसकेको छ।
बजेटको टुंगो लागेसँगै उक्त रकमबाट आवश्यक परिमाणमा रासायनिक मल खरिद गर्न छिट्टै बोलपत्र आह्वान गर्ने तयारी भइरहेको मन्त्रालयले जनाएको छ।
विगतका वर्षमा मुख्य खेती सिजनमा किसानले मल अभाव र आपूर्ति समस्याको सामना गर्नुपरेको भन्दै यसपटक समयमै प्रक्रिया अघि बढाइएको मन्त्रालयको भनाइ छ।
किसानका समस्या र आगामी खेती सिजनको आवश्यकतालाई ध्यानमा राख्दै मल खरिद तथा आपूर्ति व्यवस्थापनलाई उच्च प्राथमिकतामा राखेर काम अघि बढाइएको मन्त्रालयले जनाएको छ। समयमै खरिद प्रक्रिया सम्पन्न गरी आवश्यक मल उपलब्ध गराउने तयारी भइरहेको मन्त्रालयको दाबी छ।
