काभ्रे, २८ असोज। नेपालीहरूको महान् चाड बडादशैंलाई लक्षित गर्दै काभ्रेपलाञ्चोक जिल्लाभर १० दिनसम्म टिपर सञ्चालनमा रोक लगाइएको छ।
जिल्ला प्रशासन कार्यालयले सूचना जारी गर्दै असोज ३१ गतेदेखि कात्तिक ९ गतेसम्म जिल्लाभित्र टिपर सञ्चालन गर्न नपाइने जनाएको हो। प्रशासनका अनुसार फूलपातीदेखि पूर्णिमासम्म टिपर सञ्चालनमा पूर्ण रोक लगाउने निर्णय गरिएको छ।
जिल्ला सुरक्षा समितिको असोज २७ गते बसेको बैठकको निर्णयअनुसार उक्त अवधिमा टिपर सञ्चालन नगर्न तथा नगराउन अनुरोध गरिएको सहायक प्रमुख जिल्ला अधिकारी एवं सूचना अधिकारी महेन्द्र विश्वकर्माले जानकारी दिए।
उनका अनुसार दशैंका बेला बीपी राजमार्ग, अरनिको राजमार्गलगायत जिल्लाका प्रमुख सडकमा सवारीसाधनको चाप बढ्ने भएकाले सम्भावित दुर्घटनाको जोखिम न्यूनीकरण गर्न यस्तो निर्णय गरिएको हो।
चाडपर्वका समयमा यात्रुवाहक सवारीसाधनको आवागमन सहज, सुरक्षित र व्यवस्थित बनाउने उद्देश्यले टिपर सञ्चालनमा रोक लगाइएको प्रशासनले जनाएको छ।
प्रशासनले तोकिएको अवधिभर टिपर सञ्चालन नगर्न तथा नगराउन सम्बन्धित सबैमा अनुरोध गरेको छ।
