काठमाडौं– राष्ट्रिय प्रजातन्त्र पार्टी (राप्रपा) का संसदीय दलका नेता ज्ञानबहादुर शाहीले वर्तमान सरकारले व्यक्तिगत ‘इगो’ साट्न राज्यसत्ताको चरम दुरुपयोग गरिरहेको आरोप लगाएका छन्।
सोमबार संघीय संसद् भवन परिसरमा सञ्चारकर्मीसँग कुरा गर्दै शाहीले विधि र प्रक्रिया मिचेर गरिएका गिरफ्तारीले सरकारको छवि धुमिल भएको टिप्पणी गरे।
उनले कसैलाई पक्राउ गर्न नहुने नभए पनि पक्राउ गर्दा कानुनी आधार र अदालतको पक्राउ पुर्जी अनिवार्य हुनुपर्ने बताए। प्रमाणबिना राति पक्राउ गर्ने र पछि छाड्ने कार्यले सरकारको नियतमाथि प्रश्न उठेको उनको भनाइ थियो।
शाहीले ९ अर्ब रुपैयाँ घोटालाको आरोप लागेका जिबी राई, वाइडबडी प्रकरण तथा ४जी र एनसेलसँग सम्बन्धित विवादमा आरोपितहरू खुला रूपमा हिँडिरहेको दाबी गर्दै सरकारले समान रूपमा कानुन कार्यान्वयन गर्नुपर्ने बताए।
उनले पूर्वप्रधानन्यायाधीश चोलेन्द्रशमशेर जबरा र व्यवसायी दुर्गा प्रसाईंको गिरफ्तारीको प्रसंगसमेत उठाउँदै कानुनी राज्यको उपहास भएको जिकिर गरे।
शाहीले सरकार व्यक्तिगत प्रतिशोधका लागि शक्ति प्रयोग गर्नेतर्फ अघि बढेको आरोप लगाउँदै यस्तो प्रवृत्तिले विगत र वर्तमान सरकारबीच फरक देखाउन नसकिने बताए।
सरकारलाई सुशासनको मार्गमा अघि बढ्न सुझाव दिँदै उनले भ्रष्टाचारविरुद्ध सरकारले वास्तविक कदम चाल्ने हो भने आफ्नो दलले त्यसमा साथ दिने प्रतिबद्धता जनाए।
