नारायणगढ, २८ भदौ । नारायणगढ–मुग्लिन सडकखण्डअन्तर्गत तुइलखोलामा पहिरो खस्ने क्रम नरोकिएपछि सडक डिभिजन कार्यालयले विशेष प्रविधि अपनाएर दीर्घकालीन समाधान खोज्ने भएको छ।
वर्षायाममा मात्र नभई हिउँदमा समेत पहिरो खस्ने र सडक अवरुद्ध हुने समस्या देखिएपछि भिरको स्लोप निर्माण गरी ‘नेलिङ’ प्रविधिबाट पहिरो रोकथाम गर्ने तयारी गरिएको हो।
सडक डिभिजन भरतपुरका अनुसार नेलिङसँगै पहिरो प्रभावित क्षेत्रमा जमेको तथा रसाएको पानी बाहिर निकाल्न ‘होरिजोन्टल ड्रेन’ र बायोइन्जिनियरिङ प्रविधिसमेत प्रयोग गरिनेछ।
सडक डिभिजन भरतपुरका प्रमुख इन्जिनियर नारायणप्रसाद लामिछानेका अनुसार अहिले तुइलखोलामा माथिबाट खस्ने ठूला ढुङ्गा काटेर पन्छाउने काम भइरहेको छ।
उनका अनुसार करिब सात दिनदेखि ठूला ढुङ्गा काटेर हटाउने काम भइरहेको छ। कठिन स्थानमा सीमित जनशक्तिबाट काम भइरहेको र ठूला ढुङ्गा हटाएपछि थप जनशक्ति तथा उपकरण परिचालन गरेर काम अघि बढाइनेछ।
पहिरो रोकथामका लागि मुख्य रूपमा नेलिङ प्रविधि प्रयोग गरिने इन्जिनियर लामिछानेले बताए। यस प्रविधिमा भिरको स्लोपलाई किला वा रडको माध्यमबाट बलियो बनाइनेछ।
स्लोपको प्रकृतिअनुसार द्वि–आयामी तथा त्रि–आयामी नेटको प्रयोगसँगै बायोइन्जिनियरिङ प्रविधिबाट पहिरो रोकथामका उपाय अवलम्बन गरिने उनले जानकारी दिए।
हाल पहिरो जाने भिर काटेर ढुङ्गा हटाउँदै स्लोप बनाउने काम भइरहेको छ। उक्त काम सम्पन्न भएपछि सो क्षेत्रमा नेलिङ प्रविधि प्रयोग गरिनेछ।
पहिरो प्रभावित क्षेत्रमा जमेको तथा रसाएको पानीले भूगोललाई थप कमजोर बनाउने भएकाले पानी बाहिर निकाल्न होरिजोन्टल ड्रेनको समेत व्यवस्था गरिने भएको छ।
इन्जिनियर लामिछानेका अनुसार एक महिनाभित्र नेलिङको काम सुरु गर्ने तयारी गरिएको छ। माथिबाट खस्ने ठूला ढुङ्गा हटाएपछि तत्काल सडक अवरुद्ध हुने अवस्था पनि कम हुने अपेक्षा गरिएको छ।
यसैबीच, तुइलखोला क्षेत्रमा पहिरो रोकथाम तथा सडक सुरक्षाका लागि हाल सवारी आवागमनमा समय तालिका लागू गरिएको छ। बिहान ८:३० बजेदेखि बेलुकी ६ बजेसम्म प्रत्येक दुई घण्टामा आधा घण्टाका लागि मात्र सवारी आवागमन खुला गरिँदै आएको छ।
बेलुकी ६ बजेदेखि बिहान ८ बजेसम्म भने उक्त सडकखण्डमा सवारीसाधन निरन्तर सञ्चालन भइरहेका छन्।
