लन्डन । श्रीलंकाविरुद्धको तेस्रो तथा अन्तिम टी–२० अन्तर्राष्ट्रिय क्रिकेटमा ८ विकेटको एकपक्षीय जित निकाल्दै घरेलु टोली इङ्गल्यान्डले तीन खेलको शृंखला ३–० ले ‘क्लीन स्विप’ गरेको छ।
ओल्ड ट्राफोर्डमा प्राप्त जितसँगै इङ्गल्यान्ड भारतलाई पछि पार्दै अन्तर्राष्ट्रिय क्रिकेट परिषद् (आईसीसी) को टी–२० विश्व वरीयताको शीर्ष स्थानमा उक्लिएको छ।
जितका लागि पाएको १२५ रनको सामान्य लक्ष्य इङ्गल्यान्डले ९.४ ओभरमा २ विकेट गुमाएर पूरा गर्यो। घरेलु मैदानमा बल बाँकी रहने हिसाबले इङ्गल्यान्डले टी–२० क्रिकेटमा हात पारेको यो अहिलेसम्मकै ठूलो जित हो।
६२ बल बाँकी छँदै लक्ष्य पूरा गर्ने क्रममा जोस बटलरले ३२ बलमा ६२ रनको अविजित अर्धशतकीय पारी खेले। कप्तान ह्यारी ब्रुकले २१ बलमा ३३ रन बनाए। दोस्रो विकेटका लागि बटलर र ब्रुकबीच ८५ रनको साझेदारी भएको थियो।
यसअघि टस हारेर पहिले ब्याटिङको निम्तो पाएको श्रीलंका १८.५ ओभरमा १२४ रनमै समेटिएको थियो। श्रीलंकाका लागि पथुम निसान्काले ३६ र कमिन्दु मेन्डिसले ३५ रन बनाए पनि अन्य ब्याटरले उल्लेख्य योगदान दिन सकेनन्।
श्रीलंकालाई सस्तैमा समेट्न इङ्गल्यान्डका तीव्र गतिका बलरले उत्कृष्ट प्रदर्शन गरे। सोनी बेकरले १७ रन दिएर २ विकेट लिए भने जोफ्रा आर्चर र विल ज्याक्सले समान २–२ विकेट हात पारे। जेमी ओभरटनले ४ ओभरमा १५ रन दिएर १ विकेट लिए।
लिआम डसनले इशान मलिङ्गालाई सिधा थ्रोमार्फत रनआउट गर्दै फिल्डिङमा पनि प्रभावशाली प्रदर्शन गरे।
सन् २०२४ को गर्मीयाममा ह्यारी ब्रुकले टोलीको कप्तानी सम्हालेयता इङ्गल्यान्डले खेलेका २६ टी–२० मध्ये २३ खेलमा जित हात पारेको छ।
अब दुवै टोलीबीचको तीन खेलको एकदिवसीय (ओडीआई) शृंखला मंगलबारदेखि डरहाममा सुरु हुनेछ।
