२६ भदौ, काठमाडौं । नेपाली कांग्रेसका सभापति गगनकुमार थापाले प्रधानमन्त्री बालेन शाहलाई निजी क्षेत्रप्रति सकारात्मक दृष्टिकोण नरहेको टिप्पणी गरेका छन्।
गिरिजाप्रसाद कोइराला फाउन्डेसनले शुक्रबार आयोजना गरेको ‘समीक्षा तथा भावी योजना’ विषयक कार्यक्रममा बोल्दै थापाले प्रधानमन्त्री शाहलाई निजी क्षेत्र मन नपर्ने आफ्नो बुझाइ रहेको बताएका हुन्।
‘अहिलेको प्रधानमन्त्रीलाई निजी क्षेत्र हेर्नै मन पर्दैन,’ थापाले भने, ‘अहिलेको प्रधानमन्त्री, मेरो आफ्नो बुझाइमा, हेट्स प्राइभेट सेक्टर।’
आफूले प्रधानमन्त्री शाहबारे अनुमानका आधारमा टिप्पणी नगरेको पनि थापाले स्पष्ट पारे। उनका अनुसार प्रधानमन्त्रीका पछिल्ला अभिव्यक्ति र केही निर्णयका आधारमा यस्तो धारणा बनाइएको हो।
‘मैले अनुमानको आधारमा भनेको होइन,’ थापाले भने, ‘उहाँका पछिल्ला कतिपय अभिव्यक्तिहरू, कतिपय उहाँका निर्णयहरू...।’
थापाले आफ्नो भनाइ पुष्टि गर्न सरकारले दुग्ध विकास संस्था, हेटौँडा कपडा कारखाना र नेपाल औषधि लिमिटेडका सम्बन्धमा गरेका निर्णयलाई उदाहरणका रूपमा प्रस्तुत गरे।
यद्यपि, ती संस्थाहरू सञ्चालनमा आएर मुनाफा कमाऊन् भन्ने आफ्नो शुभेच्छा रहेको उनले बताए। ‘ती कारखाना चलुन्, मुनाफा कमाऊन्, मेरो शुभेच्छा छ,’ थापाले भने, ‘त्यसका बारेमा टिप्पणी होइन।’
उनले सरकारी संस्थान सञ्चालनसम्बन्धी निर्णय र त्यसबाट निजी क्षेत्रप्रति देखिएको दृष्टिकोणका आधारमा प्रधानमन्त्रीबारे आफ्नो धारणा सार्वजनिक गरेको बताएका छन्।
