काठमाडौं – सरकारले संसद्मा दर्ता गरेको ‘संघीय निजामती सेवा विधेयक, २०८३’ मा महिला निजामती कर्मचारीका लागि महिनावारी–रजस्वला बिदाको व्यवस्था प्रस्ताव गरेको छ।
बिहीबार संसद्मा दर्ता गरिएको विधेयकमा निजामती कर्मचारीका लागि विभिन्न नौ प्रकारका बिदाको व्यवस्था प्रस्ताव गरिएको छ। सरकारले हाल उपलब्ध बिदाका व्यवस्थामा थप गर्दै महिला कर्मचारीका लागि महिनावारी–रजस्वला बिदा पनि प्रस्ताव गरेको हो।
विधेयकमा निजामती कर्मचारीले भैपरी, घर, बिरामी, मातृत्व तथा प्रसूति, प्रसूति स्याहार, महिनावारी–रजस्वला, मृत्यु संस्कार, अध्ययन र असाधारण बिदा लिन पाउने व्यवस्था प्रस्ताव गरिएको छ।
त्यस्तै, विधेयकमा असाधारण बिदासम्बन्धी व्यवस्था पनि समावेश गरिएको छ। प्रस्तावित व्यवस्थाअनुसार निजामती कर्मचारीको बिदा तथा सुविधासम्बन्धी प्रावधानलाई संघीय निजामती सेवा कानुनमार्फत व्यवस्थित गर्ने सरकारको तयारी छ।
