२७ भदौ, काठमाडौं । साउदी अरबको रियाद र मदिना क्षेत्रमा रहेको इस्ट–वेस्ट तेल पाइपलाइनलाई लक्षित गरी भएको ड्रोन आक्रमणको मुस्लिम वर्ल्ड लिगले कडा निन्दा गरेको छ।
साउदी प्रेस एजेन्सी (एसपीए) का अनुसार मुस्लिम वर्ल्ड लिगका महासचिव शेख डा. मोहम्मद अल–इसाले आक्रमणलाई आपराधिक र विश्वासघाती गतिविधिको संज्ञा दिएका छन्। उनले यस्तो घटनाले धार्मिक तथा मानवीय मूल्यमान्यतामाथि प्रहार गर्नुका साथै अन्तर्राष्ट्रिय तथा मानवीय कानुनको समेत उल्लङ्घन गर्ने बताएका छन्।
अल–इसाले मुस्लिम वर्ल्ड लिग तथा यससँग आबद्ध संस्थाहरूको तर्फबाट साउदी अरबप्रति पूर्ण ऐक्यबद्धता व्यक्त गरेका छन्। साउदी अरबलाई आफ्नो सुरक्षा र सार्वभौमसत्ता जोगाउन आवश्यक कदम चाल्ने अधिकार रहेको भन्दै उनले आक्रमणकारीविरुद्ध कारबाही तथा नागरिकको सुरक्षा सुनिश्चित गर्ने प्रयासमा संगठनको समर्थन रहने बताएका छन्।
यसैबीच, जोर्डनले पनि साउदी अरबमाथि भएको ड्रोन आक्रमणको कडा विरोध गरेको छ। जोर्डनको विदेश मन्त्रालयले जारी गरेको वक्तव्यमा उक्त आक्रमणलाई अन्तर्राष्ट्रिय कानुन तथा संयुक्त राष्ट्रसंघको बडापत्रको उल्लङ्घनका रूपमा व्याख्या गरिएको छ।
प्राप्त विवरणअनुसार साउदी अरबको तेल पाइपलाइनमा भएको ड्रोन आक्रमण इराकी भूमिबाट गरिएको दाबी गरिएको छ। घटनाबारे इराक सरकारले अनुसन्धान अघि बढाइरहेको जनाएको छ। साउदी अरबले भने इराकले अनुसन्धान तथा घटनाको छानबिनका लागि चालेको कदमप्रति समर्थन जनाएको बताइएको छ।
