टोकियो — जापानको फुकुओकामा नेपाली युवती लक्ष्मी राजवंशीको हत्या प्रकरणमा प्रहरीले तीन नेपालीलाई पक्राउ गरेको छ।
जापान प्रहरीका अनुसार पक्राउ पर्नेमा फुकुओका सहरको हाकाता वार्डस्थित एक व्यावसायिक विद्यालयमा अध्ययनरत २८ वर्षीय सन्जु तामाङ, सागा प्रिफेक्चरको तोसु सहरमा बस्दै आएकी २५ वर्षीया अमिस्ता तामाङ र सोही स्थानमा बस्ने २२ वर्षीय प्रबिन लामा रहेका छन्।
झापाको चन्द्रगढीकी २५ वर्षीया राजवंशी गत १९ अगस्टमा फुकुओका सहरको एक नदीमा मृत अवस्थामा फेला परेकी थिइन्। प्रहरीको प्रारम्भिक अनुसन्धानअनुसार उनको टाउकोमा प्रहार गरिएको र घाँटीमा डोरीले कसेपछि नदीमा खसालिएको हुनसक्ने आशंका गरिएको छ। जापानी सञ्चारमाध्यमका अनुसार उनको बसोबास गर्ने कोठामा समेत संघर्ष भएको संकेत र रगतका दाग भेटिएका थिए।
पक्राउ परेका तीनै जनाले आरोप स्वीकार गरेका छन् वा अस्वीकार गरेका छन् भन्नेबारे प्रहरीले तत्काल सार्वजनिक गरेको छैन।
अनुसन्धानका क्रममा मृतक राजवंशीसँग प्रेम सम्बन्धमा रहेका प्रबिन लामा र पक्राउ परेकी सन्जु तामाङ एउटै घरमा बस्दै आएको तथ्यसमेत खुलेको छ।
प्रहरीले घटनाको पृष्ठभूमिमा प्रेमसम्बन्धी विवाद हुनसक्ने आशंका गरेको छ। घटनाअघि मृतक र आरोपितहरूबीच के–कस्तो सम्बन्ध तथा विवाद थियो भन्ने विषयमा प्रहरीले थप अनुसन्धान अघि बढाइरहेको छ।
जापानी प्रहरीले घटनामा एकभन्दा बढी व्यक्ति संलग्न भएको सम्भावनालाई समेत ध्यानमा राखेर अनुसन्धान गरिरहेको जनाएको छ।
