देवानगन्ज — सुनसरीको देवानगन्ज गाउँपालिका–१ मध्यहर्षाहीमा शनिबार साँझ दुई समूहबीच भएको विवादका क्रममा गोली लागेर घाइते भएका युवकको शरीरबाट गोली निकालिएको छ।
गोली प्रहारबाट स्थानीय २४ वर्षीय निरजकुमार यादव घाइते भएका थिए। घटनालगत्तै उनलाई विराटनगरस्थित नोबेल मेडिकल कलेजमा भर्ना गरिएको थियो। जिल्ला प्रहरी कार्यालय सुनसरीका प्रवक्ता प्रहरी नायव उपरीक्षक चन्द्र खड्काका अनुसार आइतबार बिहान शल्यक्रिया गरी उनको शरीरबाट गोली निकालिएको हो।
प्रहरीका अनुसार यादवको शरीरको पछाडि कम्मरमुनिको दायाँ भागमा गोली लागेको थियो। शरीरबाट निकालिएको गोली कटुवा पेस्तोलमा प्रयोग हुने गोलीजस्तो देखिए पनि परीक्षणपछि मात्रै कुन हतियारबाट प्रहार भएको हो भन्ने यकिन हुने प्रहरीले जनाएको छ।
घटनास्थलबाट हतियार तथा गोलीको खोका फेला नपरेका कारण गोली लागेको हो वा अन्य कुनै हतियार प्रयोग भएको हो भन्ने विषयमा प्रहरीले थप अनुसन्धान गरिरहेको थियो। शल्यक्रियापछि गोली निकालिएसँगै त्यसलाई परीक्षणका लागि पठाउने तयारी गरिएको प्रहरीले जनाएको छ।
घटनामा संलग्न भएको आरोपमा देवानगन्ज गाउँपालिका–२ का १८ वर्षीय विष्णुकुमार यादव र २६ वर्षीय जयकृष्ण यादव (लाली) पक्राउ परेका छन्। उनीहरूमाथि अनुसन्धान भइरहेको प्रहरीले जनाएको छ।
गोली चलेपछि स्थानीयले विष्णु र जयकृष्णलाई नियन्त्रणमा लिएर रुखमा बाँधेका थिए। प्रहरी पुगेपछि स्थानीयले उनीहरूलाई प्रहरीको जिम्मा लगाएका थिए। स्थानीयले उनीहरूले प्रयोग गरेको मोटरसाइकलमा समेत आगजनी गरेका थिए।
घटनामा संलग्न अन्य व्यक्तिको खोजी भइरहेको डीएसपी खड्काले जानकारी दिए।
प्रहरीका अनुसार शनिबार साँझ निरज आफ्ना छिमेकी विवेककुमार यादवसँग मोटरसाइकलमा हरिनगर बजारबाट घर फर्किरहेका बेला उनीमाथि गोली प्रहार भएको थियो। गोली प्रहार गर्ने समूहले विवेकमाथि पनि हातपात गरेको थियो।
प्रहरीले प्रारम्भिक अनुसन्धानमा घटनाको कारण पुरानो रिसिइबी तथा युवतीको विषयलाई लिएर भएको विवाद हुन सक्ने जनाएको छ। घटनाबारे थप अनुसन्धान भइरहेको प्रहरीले जनाएको छ।
यसअघि गत साउन १० गते देवानगन्ज गाउँपालिका–३ कप्तानगन्जमा दुई समूहबीच भएको विवादका क्रममा प्रहरीले चलाएको गोली लागेर तीन जनाको मृत्यु भएको थियो भने सात जना घाइते भएका थिए।
