काठमाडौं । अन्तर्राष्ट्रिय कल बाइपास (भिओआईपी) मा प्रयोग गरिएका विभिन्न उपकरणसहित एक भारतीय नागरिक पक्राउ परेका छन्।
पक्राउ पर्नेमा २५ वर्षीय काथराम नितिन रहेका छन्। उनलाई केन्द्रीय अनुसन्धान ब्यूरो (सीआईबी) र जिल्ला प्रहरी कार्यालय चितवनबाट खटिएको टोलीले नेपाल टेलिकम र एनसेल आजियाटा लिमिटेडको प्राविधिक समन्वयमा पक्राउ गरेको हो।
प्रहरीका अनुसार नितिनलाई चितवनको भरतपुर महानगरपालिका–२, आँपटारीबाट पक्राउ गरिएको हो।
प्रहरीले उनको साथबाट २६ थान मोबाइल, दुई थान ल्यापटप, ९५ थान सिमकार्ड, चार थान सीपीयू, एक थान इन्भर्टर, दुई थान ब्याट्री, छ थान यूएसबी, दुई थान राउटर तथा विभिन्न प्रकारका डेटा केबललगायत सामग्री बरामद गरेको जनाएको छ।
प्रारम्भिक अनुसन्धानका क्रममा बरामद गरिएका उपकरण तथा सामग्री अवैध रूपमा अन्तर्राष्ट्रिय कल बाइपास (भिओआईपी) सञ्चालनमा प्रयोग गरिएको खुलेको केन्द्रीय समाचारकक्षले जनाएको छ।
घटनाबारे प्रहरीले थप अनुसन्धान गरिरहेको जनाएको छ।
