काठमाडौं । नेकपा एमालेका प्रमुख सचेतक ऐन महरले सुरुङमा फसेका नागरिकको जीवनरक्षाका लागि तत्काल सम्पूर्ण राज्यशक्ति र आवश्यक जनशक्ति परिचालन गर्न गृहमन्त्री सुधन गुरुङलाई आग्रह गरेका छन्।
महरले शुक्रबार सामाजिक सञ्जालमार्फत गृहमन्त्री गुरुङले उद्धार अभियानको प्रत्यक्ष कमाण्ड सम्हाल्दै सम्बन्धित सबै निकायबीच प्रभावकारी समन्वय गर्नुपर्ने बताएका हुन्।
उनले आवश्यक परे अन्तर्राष्ट्रिय सहयोग लिन तथा सम्बन्धित जलविद्युत् आयोजना र प्राविधिक जनशक्तिसँग समन्वय गरेर उद्धार अभियानलाई तीव्रता दिन पनि सुझाव दिएका छन्।
‘गृहमन्त्रीज्यू, प्लिज तपाईं कमाण्ड सम्हाल्नुहोस्, समन्वय गर्नुहोस् र सञ्चार गर्नुहोस्,’ महरले भनेका छन्।
महरले गृहमन्त्रीले उद्धारस्थलमा अक्सिजन सिलिन्डर बोक्नेभन्दा उद्धार अभियानको समन्वय, आवश्यक निर्णय र व्यवस्थापनमा ध्यान दिनुपर्ने बताएका छन्।
‘तपाईंको काम त्यो अक्सिजन सिलिन्डर बोक्ने होइन। तपाईंले गर्दा त्यहाँ काम गर्ने मान्छेलाई डिस्टर्ब भइरहेको छ,’ उनले सामाजिक सञ्जालमा लेखेका छन्।
उनले सामाजिक सञ्जालमा भाइरल हुने गतिविधिभन्दा सुरुङमा फसेका नागरिकको जीवन रक्षा सरकारको प्राथमिकता हुनुपर्नेमा जोड दिएका छन्।
महरका अनुसार अक्सिजन सिलिन्डर बोक्ने लगायतका प्रत्यक्ष उद्धारसम्बन्धी काममा सुरक्षाकर्मी परिचालन गर्न सकिन्छ। गृहमन्त्रीले भने त्यसभन्दा महत्वपूर्ण रूपमा उद्धार अभियानको नेतृत्व, समन्वय र व्यवस्थापनमा केन्द्रित हुनुपर्ने उनको भनाइ छ।
‘त्यो सिलिन्डर बोक्ने काम त त्यहाँ खटिएको एक जना प्रहरी जवानले गरिहाल्नुहुन्छ नि। त्यसका लागि गृहमन्त्री चाहिँदैन,’ महरले भनेका छन्।
सुरुङमा फसेका नागरिकको उद्धारलाई प्रभावकारी बनाउन राज्यका सबै उपलब्ध स्रोत, साधन र जनशक्ति तत्काल परिचालन गर्नुपर्ने उनको आग्रह छ।
