क्यानबेरा, ४ असोज – नेपालमा हालै आएको बाढीपहिरोबाट प्रभावित नागरिकको राहत तथा पुनर्स्थापनाका लागि अस्ट्रेलियाको क्यानबेरामा करिब १५ हजार अस्ट्रेलियन डलर आर्थिक सहयोग संकलन गरिएको छ।
आर्ट साउन्ड एफएम र नेपाली कला, संस्कृति तथा साहित्य प्रतिष्ठानको संयुक्त आयोजनामा सम्पन्न ‘नेपाल फ्लड डिजास्टर अपिल’ कार्यक्रममार्फत उक्त रकम संकलन गरिएको हो।
क्यानबेराको टर्नरस्थित पोलिस ह्वाइट इगल क्लबमा आयोजित च्यारिटी कार्यक्रममा नेपाली समुदायसँगै अस्ट्रेलियाली नागरिक, सामाजिक अभियन्ता तथा कलाकारहरूको उल्लेख्य सहभागिता रहेको थियो।
प्रधानमन्त्री राहत कोषमा समेत रकम जम्मा गरिने
आयोजकका अनुसार संकलित रकममध्ये केही हिस्सा इमर्जेन्सी एक्सन एलायन्सको ‘नेपाल फ्लड डिजास्टर अपिल’मा र बाँकी रकम नेपाल सरकारको प्रधानमन्त्री दैवी प्रकोप उद्धार कोषमा जम्मा गरिनेछ।
आर्ट साउन्ड एफएमका अध्यक्ष स्टिभ लिटलले मानवीय संकटका समयमा समुदायबीचको सहकार्य महत्वपूर्ण हुने बताए। समाचारका शीर्षकबाट विपद्का विषय हट्दै गए पनि नेपाली समुदायप्रतिको आफ्नो संस्थाको साथ र समर्थन निरन्तर रहने प्रतिबद्धता उनले व्यक्त गरे।
जलवायु परिवर्तनको असरबारे ध्यानाकर्षण
कार्यक्रममा जलविज्ञ डा. दुर्गादत्त कँडेलले विश्वव्यापी तापक्रम वृद्धि तथा जलवायु परिवर्तनले नेपालमा पारिरहेको प्रभावबारे चिन्ता व्यक्त गरे।
संवेदनशील भौगोलिक अवस्थाका कारण नेपालले सामना गरिरहेका प्राकृतिक विपद्का चुनौतीबारे अस्ट्रेलियाली तथा अन्तर्राष्ट्रिय समुदायले गम्भीरतापूर्वक ध्यान दिनुपर्ने उनले बताए।
अर्थशास्त्री डा. कृष्ण हमालले विपद्को कठिन समयमा राहत संकलनका लागि ऐक्यबद्धता जनाउने अस्ट्रेलियाली तथा नेपाली समुदाय, स्वयंसेवक र आयोजकप्रति आभार व्यक्त गरे।
सांगीतिक तथा नाटक प्रस्तुति
आश्मा बुढाथोकीले सञ्चालन गरेको कार्यक्रममा अस्ट्रेलियन ब्यान्ड ‘द डेभिल एन्ड द बनी’ र ‘द डेजी कलेक्टिभ’ले सांगीतिक प्रस्तुति दिएका थिए।
नेपाली कलाकार शशांक अधिकारी, नवीन अधिकारी, उषा दवाडी र अर्णव सम्मान पौडेलले नेपालमा आएको बाढीपहिरोलाई विषयवस्तु बनाएर मर्मस्पर्शी नाटक प्रस्तुत गरेका थिए।
यज्ञ अधिकारीले कविता वाचन तथा जिसस भण्डारीले बाँसुरीवादन प्रस्तुत गरेका थिए।
कार्यक्रममा प्रत्यक्ष उपस्थित हुन नसक्ने दर्शकका लागि आर्ट साउन्ड एफएम तथा युट्युबमार्फत प्रत्यक्ष प्रसारणको व्यवस्था गरिएको थियो।
