कपिलवस्तु, २८ भदौ । कपिलवस्तु नगरपालिका–६ बर्मेलीस्थित बाणगङ्गा नदीमा शनिबार राति एक्कासि आएको बाढीमा फसेका १२ जनाको सशस्त्र प्रहरीले सकुशल उद्धार गरेको छ।
बाढीका कारण नदी क्षेत्रमा फसेका ११ महिला र एक पुरुषलाई सशस्त्र प्रहरी बल, नेपाल नं. २८ गण हेडक्वार्टर कपिलवस्तुबाट खटिएको टोलीले उद्धार गरी सुरक्षित स्थानमा पुर्याएको हो।
सशस्त्र प्रहरी उपरीक्षक गोपाल अधिकारीका अनुसार बाणगङ्गा नदीमा अचानक पानीको बहाव बढेपछि मानिसहरू फसेको सूचना प्राप्त हुनासाथ उद्धार टोलीलाई तत्काल घटनास्थलमा परिचालन गरिएको थियो।
उनका अनुसार नदीमा पानीको बहाव तीव्र भएपछि जोखिममा रहेका व्यक्तिहरूलाई तत्काल उद्धार गरी सुरक्षित स्थानमा ल्याइएको हो।
उद्धार गरिएकामा कपिलवस्तु नगरपालिका–६ की ७० वर्षीया गोपी परियार, ७० वर्षीया किरली परियार, २४ वर्षीया कविता कुमाल, ३८ वर्षीया रामी वयम्बु, ३२ वर्षीया मीना वयम्बु, ४५ वर्षीया बेलमति सुनार, ४५ वर्षीया सुश्मा जिसी, १८ वर्षीया लालुमाया श्रेष्ठ, ३४ वर्षीया लक्ष्मी परियार, ४० वर्षीया बिना विक, २४ वर्षीया बिन्दा थापा र ३७ वर्षीय रेशम परियार रहेका छन्।
घटनाको जानकारी पाएलगत्तै नेपाल प्रहरी र सशस्त्र प्रहरीको संयुक्त टोली घटनास्थलमा पुगेको थियो। टोलीले उद्धार कार्य सञ्चालन गरी बाढीमा फसेका सबै १२ जनालाई सुरक्षित स्थानमा पुर्याएको सशस्त्र प्रहरी बल, नेपाल नं. २८ गण हेडक्वार्टर कपिलवस्तुले जनाएको छ।
