जनकपुरधाम । आर्थिक मन्दी, बैंक तथा वित्तीय संस्थाबाट ऋण लगानीमा कमी, पुँजी अभाव तथा स्थानीय तहमा उद्योग दर्ता गर्ने क्रम बढ्नुलगायतका कारण मधेस प्रदेशमा गत आर्थिक वर्ष २०८२/८३ मा एक हजार ९३८ उद्योग तथा व्यवसाय बन्द भएका छन्।
मधेस प्रदेश सरकारको उद्योग, वाणिज्य तथा पर्यटन मन्त्रालयका अनुसार उक्त अवधिमा उद्योगतर्फ ८२१ र वाणिज्यतर्फ एक हजार ११७ गरी कुल एक हजार ९३८ उद्योग तथा व्यवसायको लगत कट्टा गरिएको हो।
यद्यपि, सोही आर्थिक वर्षमा मधेस प्रदेशमा पाँच हजार ६८ वटा नयाँ उद्योग दर्ता भएका छन्। मन्त्रालयका सूचना अधिकारी उपेन्द्रकुमार महतोका अनुसार नयाँ उद्योग दर्तामध्ये सबैभन्दा धेरै पर्सामा एक हजार १०१ वटा रहेका छन्।
त्यसैगरी धनुषामा ७७७, बारामा ६३९, सर्लाहीमा ६३६, सिरहामा ५५४, रौतहटमा ५३३, महोत्तरीमा ५१४ र सप्तरीमा ३१४ वटा नयाँ उद्योग दर्ता भएका छन्।
गत आर्थिक वर्षमा मधेस प्रदेशभर सात हजार ५४० वटा उद्योगको नवीकरण गरिएको मन्त्रालयले जनाएको छ।
वाणिज्यतर्फ भने छ हजार १२२ वटा नयाँ प्राइभेट फर्म तथा १८ वटा साझेदारी फर्म दर्ता भएका छन्। सो अवधिमा वाणिज्यतर्फ ११ हजार १४४ वटा फर्मको नवीकरण गरिएको सूचना अधिकारी महतोले जानकारी दिए।
नयाँ उद्योग तथा वाणिज्य दर्ता, नवीकरणलगायत विभिन्न शीर्षकबाट प्रदेश सरकारले पाँच करोड २६ लाख ४९ हजार ५६२ रुपैयाँ राजस्व सङ्कलन गरेको छ।
सूचना अधिकारी महतोका अनुसार विश्वव्यापी रूपमा देखिएको आर्थिक मन्दी तथा तरलताको प्रभाव, बैंक तथा वित्तीय संस्थाबाट अपेक्षाअनुसार ऋण प्रवाह नहुनु, व्यवसाय सञ्चालनका लागि आवश्यक पुँजीको अभाव र स्थानीय तहबाट समेत उद्योग तथा व्यवसाय दर्ता गर्ने क्रम बढ्नुजस्ता कारणले प्रदेश सरकारअन्तर्गत दर्ता भएका उद्योगको लगत कट्टा हुने सङ्ख्या बढेको हो।
