काठमाडौं । कानुन, न्याय तथा संसदीय मामिलामन्त्री सोविता गौतमले राष्ट्रिय सेवा दल विधेयकमाथि राज्य व्यवस्था तथा सुशासन समितिले गरेको संशोधन सरकारले स्वीकार गरेको बताएकी छन्।
राज्य व्यवस्था तथा सुशासन समितिको बिहीबारको बैठकमा बोल्दै मन्त्री गौतमले विधेयकमाथि समितिमा पर्याप्त छलफल गरेरै निष्कर्षमा पुगिएको बताइन्।
उनले उपसमितिले अघि सारेका विषयवस्तुमा खुला छलफल भएको र प्रधानमन्त्रीको तर्फबाट आफूलाई जिम्मेवारी दिइएकाले समितिले प्रस्ताव गरेका संशोधनहरू स्वीकार गरिएको जानकारी दिइन्।
“हामीले सबैले छलफल गरेरै टुङ्ग्याएको हो । उपसमितिले राखेका विषयवस्तु खुला छलफललाई प्रधानमन्त्रीज्यूका तर्फबाट मलाई तोकिएको कारणले स्वीकार पनि गरेका छौँ,” मन्त्री गौतमले भनिन्।
मन्त्री गौतमले राज्य व्यवस्था तथा सुशासन समितिले उत्कृष्ट ढङ्गबाट काम गरिरहेको भन्दै समितिप्रति आभारसमेत व्यक्त गरिन्।
उनका अनुसार समितिको काम अघि बढ्दै जाँदा दुई वटा विधेयकसहितको प्रतिवेदन सदनमा पेस गर्ने अवस्थामा पुगेको छ।
राष्ट्रिय सेवा दल विधेयकमाथि समितिमा भएको छलफल र संशोधनपछि अब प्रतिवेदन सदनमा पेस गर्ने प्रक्रिया अघि बढ्ने भएको छ।
