काभ्रे। जिल्ला निर्वाचन कार्यालय काभ्रेपलाञ्चोकले मतदाता नामावली अद्यावधिक गर्ने क्रममा २ हजार ६०२ जनाको नाम हटाएको छ।
कार्यालयका अनुसार दोहोरो नाम दर्ता भएका १ हजार १९८, मृत्यु भएका १ हजार ४०२ र नागरिकता परित्याग गरेका दुई जनाको नाम मतदाता नामावलीबाट हटाइएको हो।
निर्वाचन आयोगले २०८४ वैशाखभित्र स्थानीय तहको निर्वाचन गर्ने तयारी गरिरहेको छ। गत प्रतिनिधिसभा निर्वाचनमा काभ्रेपलाञ्चोक जिल्लामा ३ लाख २६ हजार ६११ मतदाता रहेका थिए।
मतदाता नामावलीबाट नाम हटाइएकामध्ये सबैभन्दा बढी भुम्लु गाउँपालिकाका ४४७ जना छन्। त्यस्तै, पनौती नगरपालिकाका ४३८ र नमोबुद्ध नगरपालिकाका ३९० जनाको नाम हटाइएको छ।
यसैगरी, बनेपा नगरपालिकाका ३२०, धुलिखेल नगरपालिकाका १७७, पाँचखाल नगरपालिकाका १३८, चौँरीदेउराली गाउँपालिकाका ११८, मण्डनदेउपुर नगरपालिकाका १०२, रोशी गाउँपालिकाका ९९, बेथानचोक गाउँपालिकाका ८८, तेमाल गाउँपालिकाका ८२ र खानीखोला गाउँपालिकाका ६८ जनाको नाम मतदाता नामावलीबाट कट्टा गरिएको कार्यालयले जनाएको छ।
मतदाता नामावली अद्यावधिक गर्नुको उद्देश्य दोहोरो दर्ता तथा मृत्यु भएका व्यक्तिको नाम हटाई नामावलीलाई व्यवस्थित र अद्यावधिक बनाउनु हो।
