तनहुँ। तनहुँको बन्दीपुर गाउँपालिका–५, याम्पाफाँटका १५ जना दुग्ध किसान दूध बिक्रीका आधारमा पुरस्कृत भएका छन्। याम्पाफाँट दुग्ध उत्पादक सहकारी संस्थाले गत आर्थिक वर्षमा सहकारीमार्फत सबैभन्दा बढी दूध बिक्री गर्ने किसानलाई नगद पुरस्कारसहित सम्मान गरेको हो।
सहकारीका अध्यक्ष काशीनाथ भट्टराईका अनुसार नमुना गाई फार्मका सञ्चालक पुष्पराज पौडेलले ८९ हजार १२८ लिटर दूध बिक्री गर्दै पहिलो स्थान हासिल गरेका छन्। त्यस्तै, ५१ हजार ८१२ लिटर दूध बिक्री गरेका व्यावसायिक किसान काशीनाथ भट्टराई दोस्रो र ४४ हजार ४४४ लिटर दूध बिक्री गरेका सुरज घिमिरे तेस्रो भएका छन्।
पुरस्कृत हुने अन्य किसानमा छविलाल घिमिरे चौथो, कमला पन्थ पाँचौँ, हरिप्रसाद भट्टराई छैटौँ, ओमप्रसाद लामिछाने सातौँ, इन्दिरा भट्टराई आठौँ, ऋषिराम भट्टराई नवौँ र रामनाथ भट्टराई दसौँ स्थानमा रहेका छन्।
त्यसैगरी मुना न्यौपाने एघारौँ, सानुमाया सुनार बाह्रौँ, टकराज लामिछाने तेह्रौँ, इन्दिरा घिमिरे चौधौँ र ओमप्रकाश गुरुङ पन्ध्रौँ भएका छन्। गुरुङले १८ हजार १८४ लिटर दूध बिक्री गरेका थिए।
सहकारीका अध्यक्ष भट्टराईका अनुसार पुरस्कृत किसानलाई तीन हजारदेखि ११ हजार रुपैयाँसम्म नगद पुरस्कार प्रदान गरिएको छ।
याम्पाफाँट दुग्ध उत्पादक सहकारी संस्थाले गत आर्थिक वर्षमा १४ लाख लिटरभन्दा बढी दूध बिक्री गरी १७ करोड रुपैयाँभन्दा बढीको कारोबार गरेको थियो। पशुपालनको महत्त्वपूर्ण केन्द्रका रूपमा परिचित याम्पाफाँटका किसान लामो समयदेखि व्यावसायिक पशुपालनमा संलग्न छन्।
दुग्ध उत्पादनलाई आम्दानीको प्रमुख माध्यम बनाउँदै आएका यहाँका किसानले स्थानीय अर्थतन्त्र र कृषि उद्यमको विकासमा योगदान पुर्याउँदै आएका छन्।
