धनगढी – कैलालीमा जातीय विभेद तथा छुवाछुत गरेको आरोपमा तीन जना शिक्षक पक्राउ परेका छन्।
गौरीगंगा नगरपालिका–६, मोयास्थित भैरव आधारभूत विद्यालयमा जातीय विभेद तथा छुवाछुत गरेको आरोपमा शिक्षकहरू भगवती बडैला, भगवती रेग्मी र टेकराज उपाध्याय पक्राउ परेको प्रहरीले जनाएको छ।
दलित समुदायका विद्यार्थी तथा अभिभावकले दिएको जाहेरीका आधारमा तीनै जनालाई पक्राउ गरिएको जिल्ला प्रहरी कार्यालय कैलालीका डीएसपी हिरासिंह महराले जानकारी दिए।
जाहेरीमा दलित समुदायका विद्यार्थी, विद्यालय व्यवस्थापन समितिका अध्यक्ष, शिक्षिका तथा कार्यालय सहयोगीमाथि जातीय विभेद गरेको आरोप लगाउँदै कानुनी कारबाहीको माग गरिएको छ।
प्रहरीका अनुसार विद्यालय व्यवस्थापन समितिका अध्यक्ष चक्रबहादुर विक, शिक्षिका बिना विक, कार्यालय सहयोगी लक्ष्मीदेवी दमाई तथा दलित समुदायका विद्यार्थीमाथि जातीय विभेद गरेको आरोप लगाइएको छ।
घटनाबारे प्रहरीले थप अनुसन्धान गरिरहेको जनाएको छ।
