काठमाडौं । श्रम संस्कृति पार्टीका प्रमुख सचेतक आरेन राईले रसुवाको भोटेकोशीमा आएको बाढीपछि सरकारले खोज तथा उद्धारको काम प्रभावकारी रूपमा गर्न नसकेको आरोप लगाएका छन्।
प्रतिनिधिसभाको मंगलबारको बैठकमा बोल्दै राईले रसुवालगायत बाढी प्रभावित जिल्लामा खोज, उद्धार तथा राहतका कार्यक्रम प्रभावकारी रूपमा सञ्चालन हुन नसकेको बताएका हुन्।
उनले रसुवाको हाकुबेसीस्थित सुरुङमा फसेका नागरिकको उद्धारका लागि पर्याप्त सुरक्षाकर्मी तथा विज्ञ परिचालन नगरिएको आरोपसमेत लगाए।
‘हाकुबेसी सुरुङमा हाम्रो अध्यक्षज्यूसहितको टोलीले काम गरिरहेको छ। त्यहाँ करिब ३ सय जना बेपत्ता हुनुहुन्छ। अहिले जम्मा २० जना उद्धारकर्मी मात्र खटाइएको छ। यो सरकारलाई म प्रश्न गर्न चाहन्छु,’ उनले भने।
प्रमुख सचेतक राईले चिलिमे हाइड्रोपावर क्षेत्रमा समेत ६ देखि ८ जना बेपत्ता भएको जानकारी आएको बताए। सरकारको कमजोरीका कारण उद्धार गर्न सकिने नागरिकको समेत अकालमा ज्यान गएको उनको आरोप थियो।
‘चिलिमे हाइड्रोपावरमा पनि करिब ६ देखि ८ जना त्यहाँभित्र बेपत्ता छन् भनिएको छ। सरकारको कमजोरीका कारण धेरै बाँच्न सक्ने र बचाउन सकिने आम नागरिकको अकालमा ज्यान गएको छ,’ उनले भने।
राईले बाढी प्रभावित क्षेत्रमा उद्धार तथा राहत कार्यलाई तीव्र र प्रभावकारी बनाउन सरकारको ध्यानाकर्षण गराएका छन्।
