काठमाडौं — नेपाल स्टक एक्सचेञ्ज लिमिटेड (नेप्से) को रिक्त प्रमुख कार्यकारी अधिकृत (सीईओ) पदका लागि चार जना उम्मेदवारको संक्षिप्त सूची सार्वजनिक भएको छ।
अर्थ मन्त्रालयअन्तर्गतको प्रमुख कार्यकारी अधिकृत छनोट तथा सिफारिस समितिले सोमबार सूचना जारी गर्दै संक्षिप्त सूचीमा परेका उम्मेदवारहरूको नाम सार्वजनिक गरेको हो। समितिले उनीहरूको नेतृत्व क्षमता, कार्ययोजनाको प्रस्तुतीकरण तथा अन्तर्वार्ताको तालिकासमेत सार्वजनिक गरेको छ।
नेप्सेको रिक्त सीईओ पद खुला प्रतिस्पर्धाबाट पूर्ति गर्न समितिले गत साउन १२ गते आवेदन आह्वान गरेको थियो। निर्धारित समयभित्र आठ जना उम्मेदवारले आवेदन दिएका थिए।
प्राप्त आवेदनमध्ये ‘नेपाल स्टक एक्सचेञ्ज लिमिटेडको प्रमुख कार्यकारी अधिकृत पदमा नियुक्तिका लागि सिफारिससम्बन्धी कार्यविधि, २०८३’ को दफा ६.२ बमोजिम चार जनालाई संक्षिप्त सूचीमा छनोट गरिएको समितिले जनाएको छ।
संक्षिप्त सूचीमा अनिल राज पौडेल, नवराज सापकोटा, नारायण प्रसाद सापकोटा र प्रताप सुवेदी रहेका छन्।
छनोट भएका उम्मेदवारहरूको दोस्रो चरणको मूल्याङ्कनअन्तर्गत नेतृत्व क्षमता, कार्ययोजनाको प्रस्तुतीकरण तथा अन्तर्वार्ता असोज २३ गते सिंहदरबारस्थित अर्थ मन्त्रालयमा हुने समितिले जनाएको छ।
उक्त मूल्याङ्कनपछि योग्य उम्मेदवारलाई सीईओ पदमा नियुक्तिका लागि सिफारिस गर्ने प्रक्रिया अघि बढाइनेछ।
