काठमाडौं । बाढीमा बेपत्ता भएका आफन्तको खोजीमा रहेका परिवारलाई नेपाल प्रहरीले डीएनए परीक्षणका लागि नमुना उपलब्ध गराउन आग्रह गरेको छ।
हाल फेला परेका शव तथा शरीरका अंग आफ्ना बेपत्ता आफन्तका हुन् वा होइनन् भन्ने यकिन गर्न डीएनए परीक्षण गर्न चाहने परिवारले तोकिएको स्थानमा सम्पर्क गर्न सक्ने प्रहरीले जनाएको छ।
डीएनए परीक्षणका लागि रगतको नाता पर्ने आफन्तको रगतको नमुना लिएर महाराजगञ्जस्थित नेपाल प्रहरी अस्पतालको प्रयोगशाला वा नजिकको जिल्ला प्रहरी कार्यालयमा सम्पर्क गर्न प्रहरीले अनुरोध गरेको छ।
रगतको नमुना संकलन गरिने व्यक्तिको पासपोर्ट साइजको दुई प्रति फोटो समेत आवश्यक पर्ने प्रहरीले जानकारी दिएको छ।
विदेशमा रहेका आफन्तले पनि डीएनए प्रोफाइलिङ गर्न सक्ने
बेपत्ता व्यक्तिका नजिकका आफन्त विदेशमा रहेको अवस्थामा उनीहरूले पनि डीएनए परीक्षण प्रक्रियामा सहभागी हुन सक्ने प्रहरीले जनाएको छ।
प्रहरीका अनुसार विदेशमा रहेका आफन्तले बाबु, आमा, छोरा वा छोरीमध्ये कुनै एक जनाको डीएनए प्रोफाइलिङ सम्बन्धित देशमै गराएर नेपाल पठाउन सक्नेछन्।
विदेशमा गरिएको डीएनए प्रोफाइलिङको सफ्टकपी नेपाल प्रहरीको इमेल dnacodis@nepalpolice.gov.np मा पठाउन प्रहरीले अनुरोध गरेको छ।
शव पहिचानमा डीएनए परीक्षणको प्रयोग
बाढी तथा पहिरोपछि विभिन्न स्थानबाट फेला परेका शव तथा शरीरका अंगको पहिचान गर्न डीएनए परीक्षणलाई महत्वपूर्ण माध्यमका रूपमा प्रयोग गर्न लागिएको हो।
परिवारका सदस्यबाट संकलन गरिएको डीएनए नमुनासँग फेला परेका शव तथा शरीरका अंगको नमुना परीक्षण गरी पहिचान गर्न सकिने प्रहरीले जनाएको छ।
बाढीमा परी ९०० भन्दा बढीको मृत्यु भएको र ४ हजारभन्दा बढी व्यक्ति अझै हराइरहेको अवस्थामा बेपत्ता व्यक्तिको पहिचान तथा खोजीमा डीएनए परीक्षणले सहयोग पुग्ने अपेक्षा गरिएको छ।
प्रहरीले बेपत्ता आफन्तको खोजीमा रहेका परिवारलाई आवश्यक प्रक्रिया पूरा गरी तोकिएका स्थानमा सम्पर्क गर्न आग्रह गरेको छ।
