काठमाडौं — रसुवाको भोटेकोशी नदीमा भदौ १० गते बुधबार बिहान आएको बाढीमा परी घाइते भएका २० जनामध्ये १७ जना उपचारपछि वीर अस्पतालबाट डिस्चार्ज भएका छन्।
वीर अस्पतालका निर्देशक डा. विकास नेपालका अनुसार बाढीमा परी घाइते भएका २० जनालाई उपचारका लागि अस्पताल ल्याइएको थियो। स्वास्थ्य अवस्थामा सुधार आएपछि १७ जनालाई डिस्चार्ज गरिएको हो।
अस्पतालमा अझै तीन जना उपचाररत छन्। निर्देशक डा. नेपालका अनुसार उपचाररत तीनै जनाको स्वास्थ्य अवस्था सामान्य रहेको छ।
यसैबीच, बाढीमा परी घाइते भएका तथा सम्पर्कविहीन व्यक्तिका आफन्तलाई आवश्यक सूचना उपलब्ध गराउन नेपाल प्रहरीले वीर अस्पताल र राष्ट्रिय ट्रमा सेन्टरमा नागरिक सहायता कक्ष स्थापना गरेको छ।
सहायता कक्षमार्फत घाइतेको स्वास्थ्य अवस्थाबारे जानकारी लिनुका साथै सम्पर्कविहीन आफन्तको विवरण टिपाउने काम भइरहेको प्रहरीले जनाएको छ। आफ्ना परिवारका सदस्यको अवस्थाबारे जानकारी लिन आफन्तहरू अस्पताल पुग्ने क्रम पनि जारी छ।
भोटेकोशी बाढी प्रभावित क्षेत्रमा खोज तथा उद्धार र राहत वितरणको कामलाई समेत निरन्तरता दिइएको छ। उद्धार गरिएका घाइतेको उपचार तथा उनीहरूका आफन्तसँग समन्वय गर्न सम्बन्धित निकायले आवश्यक पहल गरिरहेका छन्।
