काठमाडौं — विपद्बाट प्रभावित बालबालिकाको संरक्षण तथा उनीहरूको मनोसामाजिक विकासमा सहयोग पुर्याउने उद्देश्यले रसुवा जिल्लाका विभिन्न स्थानमा १३ वटा बालमैत्री केन्द्र स्थापना गरिएको छ।
नेपाल रेडक्रस सोसाइटीले युनिसेफको सहयोगमा स्थापना तथा सहजीकरण गरेका यी केन्द्रमा भोटेकोशी बाढीबाट प्रभावित बालबालिकालाई सुरक्षित, सहज र बालमैत्री वातावरण उपलब्ध गराइएको छ।
स्थापना गरिएका १३ केन्द्रमध्ये नौ वटा पूर्ण रूपमा सञ्चालनमा आइसकेका छन् भने बाँकी चार वटा सञ्चालनको प्रक्रियामा रहेका छन्। हाल सञ्चालनमा रहेका केन्द्रमा ४६२ बालबालिकाको हेरचाह भइरहेको नेपाल रेडक्रस सोसाइटी, रसुवा शाखाले जनाएको छ।
केन्द्रमा बालबालिकाको उमेर र आवश्यकताअनुसार खेलकुद, मनोरञ्जन, सिकाइ, सिर्जनात्मक गतिविधि तथा मनोसामाजिक सहयोगसम्बन्धी कार्यक्रम सञ्चालन भइरहेका छन्। विपद्पछि सुरक्षित र सकारात्मक वातावरणमा आफ्ना भावना व्यक्त गर्न, साथीहरूसँग घुलमिल हुन तथा सिर्जनात्मक गतिविधिमा सहभागी हुन केन्द्रले बालबालिकालाई अवसर प्रदान गरेको छ।
केन्द्रमा रहेका ४६२ बालबालिकामध्ये २१९ जना बालक र २४३ जना बालिका छन्। उमेर समूहका आधारमा पाँच वर्षमुनिका ८८ जना र पाँच वर्षभन्दा माथिका ३७४ जना बालबालिका रहेका छन्।
केन्द्रमा आश्रय लिइरहेका बालबालिकामध्ये एक जना अपांगता भएका बालबालिका रहेको नेपाल रेडक्रस सोसाइटी, रसुवा शाखाले जनाएको छ।
