रसुवाको लाङटाङ खोला जलविद्युत् आयोजनाको सुरुङबाट दुई जनाको शव निकालिएको छ। आयोजनामा बाढी तथा अन्य विपद्का कारण प्रभावित भएका व्यक्तिको खोजीका क्रममा सुरुङभित्रबाट दुई शव फेला परेको हो।
आयोजनाका प्रबन्धक विजयमान भट्टराईका अनुसार नेपाली सेनाको खोज तथा उद्धार टोलीले सुरुङभित्रबाट दुई जनाको शव बाहिर निकालेको हो।
उनका अनुसार अहिले हाइड्रो–मेकानिकल इन्जिनियरसहितको प्राविधिक टोली सुरुङभित्र करिब १५० मिटर दूरीसम्म प्रवेश गरेर खोज तथा उद्धार कार्यमा जुटेको छ।
२० मेगावाट क्षमताको उक्त जलविद्युत् आयोजनामा कार्यरत ४१ जना अझै सम्पर्कविहीन रहेको भट्टराईले जानकारी दिए। उनीहरूको खोजीका लागि नेपाली सेना, सशस्त्र प्रहरी र आयोजनाको प्राविधिक टोली परिचालन गरिएको छ।
बुधबार पनि उद्धार टोली सुरुङभित्र करिब १५० मिटरसम्म प्रवेश गरेर खोजीमा जुटेको थियो। बिहीबार बिहानैदेखि खोज तथा उद्धार कार्यलाई थप तीव्रता दिइएको आयोजनाले जनाएको छ।
सम्पर्कविहीन व्यक्तिको अवस्था यकिन गर्न सुरुङभित्रको जोखिमपूर्ण क्षेत्रमा समेत प्राविधिक टोली परिचालन गरिएको छ। उद्धार कार्य जारी रहेकाले थप विवरण आउन बाँकी छ।
