काठमाडौं —
स्वास्थ्य तथा जनसंख्या मन्त्रालयले विपद्को विषम परिस्थितिलाई मध्यनजर गर्दै स्वास्थ्य क्षेत्रमा कार्यरत कर्मचारीलाई अत्यावश्यक अवस्थाबाहेक बिदा नलिन निर्देशन दिएको छ।
मन्त्रालयले सार्वजनिक बिदाका दिनसमेत खोज, उद्धार तथा उपचार सेवाका लागि आवश्यक जनशक्तिलाई तयारी अवस्थामा राख्न मातहतका निकायलाई निर्देशन दिएको हो।
मन्त्रालयको प्रशासन तथा व्यवस्थापन शाखाले शुक्रबार जारी गरेको निर्देशनमा रसुवाको भोटेकोशी नदीमा आएको विनाशकारी बाढी तथा पहिरोबाट ज्यान गुमाएकाहरूप्रति श्रद्धाञ्जली व्यक्त गर्दै प्रभावित क्षेत्रमा खोज, उद्धार, स्वास्थ्योपचार तथा राहतका काम भइरहेको उल्लेख गरिएको छ।
मन्त्रालयले आफू मातहतका सबै कर्मचारीलाई विपद् व्यवस्थापनमा आवश्यकताअनुसार परिचालन गर्न सक्ने गरी विशेष कारण र अत्यावश्यक कामबाहेक बिदा तथा काज स्वीकृत नगर्न/नगराउन निर्देशन दिएको छ।
त्यस्तै, खोज, उद्धार तथा उपचारसँग सम्बन्धित निकायका प्रमुख, फोकल पर्सन तथा जिम्मेवार पदाधिकारीलाई सार्वजनिक बिदाका दिनसमेत कार्यालयमा उपस्थित भएर आवश्यक व्यवस्थापन गर्न भनिएको छ।
अन्य कर्मचारीलाई समेत अत्यावश्यक स्वास्थ्य सेवा निरन्तर सञ्चालनका लागि तयारी अवस्थामा रहन मन्त्रालयले निर्देशन दिएको छ।
अस्पतालमा कार्यरत स्वास्थ्यकर्मीलाई भने सार्वजनिक बिदाका दिनसमेत बाढी तथा पहिरो प्रभावित क्षेत्रमा घाइते भएकाहरूको उपचारका लागि आवश्यक व्यवस्था मिलाउन मन्त्रालयले अनुरोध गरेको छ।
मन्त्रालयले विपद्को समयमा स्वास्थ्य सेवा प्रभावित हुन नदिन आवश्यक जनशक्ति तथा स्रोतसाधनको प्रभावकारी परिचालनमा विशेष ध्यान दिन सम्बन्धित निकायलाई आग्रह गरेको छ।
