इनरुवा। कप्तानगञ्ज घटनालाई लिएर हिन्दु सम्राट सेनाले प्रशासनलाई २४ घण्टे अल्टिमेटम दिँदै सुनसरी बन्दको चेतावनी दिएपछि तनावग्रस्त क्षेत्रमा थप अशान्ति फैलिने जोखिम बढेको छ।
हिन्दु सम्राट सेना सुनसरीका संयोजक बाबा सिंह हिन्दुले घटनामा संलग्नलाई २४ घण्टाभित्र कारबाही गर्न माग गर्दै माग पूरा नभए इनरुवासहित सुनसरीका विभिन्न स्थान बन्द गर्ने चेतावनी दिएका छन्।
सिंहले प्रमुख जिल्ला अधिकारीलाई लक्षित गर्दै आफूहरू अहिले ‘निन्द्रामा’ रहेको र आन्दोलनको ‘ट्रेलर’ मात्र सुरु भएको अभिव्यक्ति दिएका छन्। यस्तो अभिव्यक्तिले प्रशासनमाथि दबाब मात्र होइन, घटनापछि संवेदनशील बनेको सामाजिक वातावरणलाई थप उत्तेजित बनाउने खतरा बढाएको छ।
कानुनी कारबाहीको माग गर्नु नागरिकको अधिकार भए पनि बन्द, धम्की र उत्तेजक अभिव्यक्तिमार्फत प्रशासनलाई दबाबमा पार्ने प्रयासले समस्या समाधानभन्दा झन् जटिल परिस्थिति निम्त्याउन सक्ने देखिन्छ। विशेषगरी समुदायबीच अविश्वास बढिरहेको अवस्थामा यस्ता गतिविधिले सामान्य नागरिकको सुरक्षा र दैनिक जनजीवनमा प्रत्यक्ष असर पार्न सक्छ।
कप्तानगञ्ज घटनाको निष्पक्ष अनुसन्धान गरी दोषी देखिए कानुनअनुसार कारबाही गर्नु राज्यको जिम्मेवारी हो। तर अनुसन्धान र न्यायको नाममा सडक बन्द, धम्की र सम्भावित अराजकताको बाटो रोज्नुले घटनाको समाधानभन्दा तनाव थप चर्काउने खतरा रहन्छ।
अब प्रशासनसामु दुई चुनौती देखिएका छन्—घटनाको निष्पक्ष छानबिनमार्फत दोषीमाथि कारबाही गर्ने र त्यसै बहानामा उत्पन्न हुन सक्ने उत्तेजना तथा सम्भावित अराजकतालाई नियन्त्रण गर्ने।
