जेन–जी आन्दोलनका क्रममा ज्यान गुमाएका शहीदहरूको स्मृतिलाई चिरस्थायी बनाउने उद्देश्यले संसद् भवन परिसरमा निर्माण गर्न लागिएको जेन–जी मेमोरियल पार्कको शिलान्यास गरिएको छ।
आइतबार आयोजित कार्यक्रममा सरकार र जेन–जी शहीद परिवारका तर्फबाट संयुक्त रूपमा पार्कको शिलान्यास गरिएको हो।
शिलान्यास कार्यक्रममा बोल्दै गृहमन्त्री सुदन गुरुङले देशका लागि ज्यान आहुति दिने जेन–जी शहीदहरूले देखेको सपना पूरा गर्ने दिशामा सरकार अघि बढिरहेको बताए।
उनले आन्दोलनका क्रममा उठेका आकांक्षा, शहीदहरूको बलिदान र जनताको अपेक्षा पूरा गर्न केही समय लाग्न सक्ने भए पनि त्यसको उद्देश्य हासिल गर्ने दिशामा सरकार दृढताका साथ अघि बढ्ने प्रतिबद्धता व्यक्त गरे।
गृहमन्त्री गुरुङले मेमोरियल पार्क निर्माण गर्नु मात्रै शहीद जेन–जीप्रति न्याय नहुने बताए। शहीदहरूले उठाएका विषय र उनीहरूको योगदानलाई सम्बोधन गर्न अझै धेरै काम गर्न बाँकी रहेको उनको भनाइ थियो।
कार्यक्रममा भौतिक तथा पूर्वाधारमन्त्री सुनिल लम्सालले नेपालमा विभिन्न समुदाय, वर्ग र क्षेत्रका अधिकारका लागि भएका आन्दोलनले महत्वपूर्ण राजनीतिक तथा सामाजिक परिवर्तन ल्याएको उल्लेख गरे।
प्राप्त उपलब्धिलाई संस्थागत गर्दै त्यसको प्रत्यक्ष लाभ जनताको जीवनमा पुर्याउनु अहिलेको मुख्य आवश्यकता रहेको उनले बताए।
हजारौँ नागरिकका सपना र बलिदानबाट प्राप्त अवसरलाई खेर जान नदिई सुशासन, विकास र समृद्धिको बाटोमा देशलाई अघि बढाउने प्रतिबद्धता पनि मन्त्री लम्सालले व्यक्त गरे।
यसअघि सुशीला कार्की नेतृत्वको अन्तरिम सरकारले जेन–जी आन्दोलनका क्रममा ज्यान गुमाएका शहीदहरूको सम्झनामा मेमोरियल पार्क निर्माण गर्ने निर्णय गरेको थियो।
